26-сентябрда депутат, учурда УКМКнын тергөө абагында отурган Адахан Мадумаровдун ден соолугу начарлап, УКМКнын медициналык жайында текшерүүдөн өттү. Депутаттын жактоочусу Майрамбек Жумабековдун айтымында, Мадумаров кант диабети жана жүрөк оорусунан жабыркайт.

– Ден соолугу начарлап ооруканага жеткирилди. Ал кант диабети жана жүрөк оорусунан жабыркайт. Аны мындай оорусу менен камакка алууга болбойт эле. Буга чейин да “Тез жардам” кызматы чакыртылган. Негизи эле ал тез-тезден дарыгерлерге текшерилип турат,- деди Жумабеков.

Адахан Мадумаровдун кармалып, камакка алынганына 1 айга жакындап калды. Парламентте анын кармалышынын мыйзамдуулугун текшерүү үчүн депутаттык комиссия түзүү сунушталып, көпчүлүк колдобой жатат. Ал эми Мадумаровдун таламын талашкан депутаттарды вице-спикер Нурбек Сыдыгалиев “пиарчылар” деп сындады.

Мурдагы коргоо министри Исмаил Исаков депутат Мадумаровду чуулгандуу протоколго байланыштуу жоопко тартуу керек болсо, анда чек ара боюнча ошондой эле күчкө ээ башка документке кол койгону үчүн мурдагы премьер-министр Игорь Чудиновдун, мурдагы транспорт министри Нурлан Сулаймановдун да жоопкерчилиги каралышы керек деген пикирде.