Таланттуу обончу жана аткаруучу Сыймык Бейшекеев Мекен сакчыларынын күнүнө карата Улуттук филармонияда концерт берем деп чуркап жүргөн мезгили.

Чыгармачыл чөйрөдөгү жакын санаалаштар Нурдөөлөт Копоев, Роза Шакирова, Бакыт Букаев жана Назми Сүйүшкөндөр күнүнө карата кафелердин биринде чай-концерт өткөргөнү жатышат. Актёр, алпаруучу жана ырчылардан түзүлгөн бул чайлашууга бардык сүйүшкөндөр келип көңүл ачып кетишет имиш.

14-февралда спортчу Канатбек Бегалиев Сүйүү күнү менен бирге туулган күнүн белгилейт. Бул күндү жалаң достору менен өткөрүп келген Канатбек быйыл үй-бүлөсүнүн кашында болууну чечти.

“Тамашоучу” жигит Азамат Исмаилов кайсы бир телеканалда алпаруучулуктун даамын татып көрдү. Анын ырчы Айпери Кубик кызы менен бир эле жума алпаруусу жакшы сезим калтырды.

Ырчы Мелис Абдрашитов жана Алекс жакында чогуу дуэт ырдашат. Эгерде ырлары ийгиликтүү эл оозуна алынса, топ ачып калуулары да мүмкүн.

74 жаш курагында ырчы Дайыр Исмадияровдун атасы дүйнө салды. Дайырга терең кайгыруу менен көңүл айтабыз.

Ырчы Азат Болотбек “Токио” аттуу орусча ыр жаздырып, Япониянын Кыргызстандагы элчиси Син Маруого угузуп көргөн. Ага ырчынын чыгармасы жагып, өзүнүн резиденциясына кечки тамакка да чакырган.

Жаш ырчы Калыс Жакыпов 15 ырдан турган эң алгачкы ырлар жыйнагын чыгарды. Ошондой эле Бек Борбиевдин “Сахна” аттуу ырына клип тарттырууда.

Продюсер Канат Култаев өзүнүн телеберүү­лөрүнө режиссёр, ассистент жана шоу-бизнес жаатында менеджер, администраторлорду издейт. Керек болсо Канат аларды продюсерликке да үйрөтүп алам дейт. Каалоочулар kanatbek_kultaev@mail.ru дарегине резюме­ңиз­дерди жөнөтүңүздөр.