Улуттук коопсуздук мамлекеттик комитети “Аю Холдингдин” негиздөөчүсү, мурдагы депутат Шаршенбек Абдыкеримовго таандык 10 миллиард сомдон ашык суммадагы мүлк мамлекетке өткөрүлгөнүн билдирди. УКМКнын маалыматына ылайык, тергөө-оперативдик иш-чараларынын жүрүшүндө компаниянын ишмердүүлүгүндө мыйзам бузуу фактылары аныкталган. Атап айтканда, көп жылдар бою мамлекеттик органдарга жасалма каржылык отчёттор берилгендиги, салыктар менен милдеттүү төлөмдөрдөн качуу, ошондой эле кирешелерди мыйзамдаштыруу үчүн мүлктү аффилирленген адамдардын атына каттоо болгону аныкталды. Натыйжада соода-оюн-зоок борборлору, өнөр жай базалары жана коммерциялык жайлар мамлекеттин балансына өткөрүлдү. Мындан тышкары Абдыкеримовго каршы “уюшкан кылмыштуу топторду каржылоо” беренеси боюнча жаңы кылмыш иши дагы козголду. Анын тууганы жана компаниянын башкы директору Тыныбек Исаев кармалып, тергөө абагына камакка алынды.

Эске салсак, Шаршенбек Абдыкеримов 2020-жылдагы октябрь окуяларынан кийин өлкөдөн чыгып кеткени айтылат. Ал спирт өндүрүшүнө байланыштуу мыйзамсыз иш-аракеттери үчүн мурда да айыпталган.