“Супер-Инфонун” www.super.kg сайтынын үч жылдан берки активдүү форумчусу Алмаз Шаадаев 4 айдан бери ырдап келет. Чоң сахнага “Жылдын суперлери-2010” концертинде “Жанымай” аттуу ырын ырдап чыккан. Учурда дал ошол чыгармасына клип тартты.

АЛМАЗ ШААДАЕВ
Туулган жери – Нарын облусу, Ат-Башы району
Туулган жылы – 11.09.1990
Бою – 168 см, Салмагы – 58 кг
Репертуарындагы ырлары – “Жанымай”, “Кыялдануу”, “Нарыным”
Учурда Кыргыз-Түрк «Манас» университетинин туризм-саякат бөлүмүнүн 3-курсунун студенти

Режиссёру – Сүйүн Откеев
Оператору – Аман Мүркулов
Сарпталган каражаты – 1500 доллар

«ТОЛКУНДАНЫП ТАРТЫЛДЫМ»
Клип тууралуу Алмаз: “Бул ырдын сөзүн чыгармачылыктан жардам берип келген эжем Анара Чилетирова жазган. Мен үчүн ырдын мааниси менен клип төп келиши эң башкы ролдо. Ошондуктан бул клипти тартуудан мурда кыргыз ырчыларынын бир канча клиптерин көрүп чыктык да, окшоштурбаганга аракет жасадык. Буюрса, оюмдагыдай эле жаралды. Албетте, алгачкы клибим болгондон кийин камеранын жана режиссёр, операторлордун алдында бир аз сүрдөп, толкундандым. Бирок бул толкундануум алгачкы 10-15 мүнөттө гана болду. Андан кийин көнүп кеттим»,- дейт.

«КҮЗГҮГӨ БОЮМ ЖЕТПЕЙ...»
– Клип тартылып жаткандагы кызыктуу учур күзгүнү карап ырдаган жерим болду. Себеби күзгү боюмдан бийик болгондуктан, кыштын үстүнө чыгып алып ырдадым. Андан кулап кетпеш үчүн бир орунда кыймылдабай ырдадым. Мен чарчаган убакта да режиссёрлор чарчабай, кайра-кайра ырдоого туура келди.

Клипти тартууга бир ай убакыт кеткен. Башкы ролго көптөгөн сулуулардын арасынан сынак аркылуу 17 жаштагы Надирабегим аттуу кызды тандап алышкан. Видеоклипте атайын сюжет жок. Анда жигиттин кызга болгон сагыныч-кусасы чагылдырылган.

Венера Кабакбек кызы
star@super.kg