Бет териси кургап, түлөп баштадыбы? Буга муздак аба ырайы себепкер. Суукта бетке кандай кам көрүү керектиги менен бөлүшөбүз.

Кышкысын...

Чынында эле башка жыл мезгилдерине салыштырмалуу кышкысын тери бат кургап кетет. Эмнеге? Анткени эшикке чыкканда муздак аба, шамал теринин коргонуу катмарын бузат. Ал эми үйдө жылуулук системи (батарея, үй жылытуучу жабдыктар, от жаккан меш, кондиционер жана башка) иштейт. Андыктан бөлмөдөгү аба кургак болуп, териге нымдуулук жетишпей калат. Бул учурда бет териси сезимтал болуп, кургап, түлөп баштайт.

Кам көрүү

1. Жайкысын жеңил кремдерге, гелдерге басым жасасаңыз, кышкысын бул кремдердин терини коргоого алы жетпейт. Андыктан кышкысын курамында церамид, сквалан, майлар, ниацинамид жана гиалурон кычкылы бар косметикалык каражаттарга өткөн оң. 

2. Күндө бетти жууш керек, бирок ашыкча тазалайм деп агрессивдүү ыкмаларды колдонгон болбойт. Мисалы: ысык мончого бат-баттан түшүү, скраб, пилинг, пенка дегендерди күнүгө колдонуу жарабайт. Анын ордуна курамында щелочь жана майлуу кислоталар жок, жумшак гелдерди тандаган туура. Ысык да эмес, муздак да эмес, бөлмө температурасындагы сууга жуу керек. Эгер тери майлуу эмес болсо, атайын жуучу каражаттарды кечкисин эле колдонуп, эртең менен таза суу менен эле жуунуп койсо болот.

3. Аба муздак болгону менен, күндүн ультрафиолет нурлары баары бир бар. Андыктан күндөн коргоочу крем сүйкөгөндү унутпайбыз. Анан да үйдө аба кургак болсо, тери жабыркай берерин унутпаңыз. Алдын алып бөлмөгө чакан идиштерге суу куюп коюңуз, бат-баттан суу чүпүрөк менен полду жана башка жерлерди жууп-нымдап туруу керек. Күнүмдүк суу балансын толуктап, таза суу ичүүнү унутпаңыз.

4. Макияж керек. Кыш – макияж үчүн ыңгайлуу мезгил. Тоналдык жана башка кремдер бет терисине кошумча коргоочу каражат болуп берет.