2025-жылдын 30-ноябрына карата Кыргызстандын карызы 8 миллиард 850 миллион долларды түздү. Мунун 5 миллиард 288 миллион доллары тышкы карыз, 3 миллиард 561 миллион доллары ички карыз болуп саналат. Мындай маалыматты каржы министринин орун басары Нурбек Акжолов 17-февралда парламент комитетинин жыйынында депутаттардын суроосуна жооп берип жатып айтты. Парламенттин Каржы, бюджет, ишкердик жана атаандаштыкты өнүктүрүү комитетинин жыйынында Эл аралык өнүктүрүү асссоциациясынан 1 миллиард 26 миллион 760 миң доллар каражат алуу боюнча макулдашуу долбоору талкууланды. Акжоловдун айтымында, бул каражаттын 994 миллион доллары кредит, 32,7 миллион доллары грант катары алынганы жатат. Алынчу акчанын 400 миллион доллары экономиканы колдоого, 362 миллион доллары энергетика тармагына, 180 миллиону суу ресурстары тармагына, 61 миллион сому санариптештирүү иштерине жумшалары пландалууда.