Кыргызстанда эркектердин саны учурда 3,7 миллионду түзөт. Бул тууралуу Улуттук статистика комитетинин маалыматында айтылат. Бул сан жалпы калктын 49,5 пайызын түзөт. Маалыматка таянсак, эркектердин үчтөн экиси айыл жергесинде жашайт. Ошол эле учурда ар бир жетинчи эркек Бишкек шаарынын тургуну болуп саналат.

Иштеген эркектердин орточо жашы – 39 жаш. Экономикада эмгектенгендердин арасында эң көп үлүштү 35-39 жаш курагындагы топ түзөт. Эркектер негизинен экономиканын базалык тармактарында эмгектенишет: курулуш, транспорт, кен казуу, энергетика жана башка. Демографиялык көрсөткүчтөр эркектердин үй-бүлөдөгү активдүү ролун да айгинелей турганы белгиленди. 2024-жылы 45 миң эркек никеге турса, алардын басымдуу бөлүгү 20-29 жаш курагында. Эркектердин биринчи никеге тургандагы орточо жашы 27,6 жашты, ал эми кайталап никеге тургандагы орточо жашы 39,6 жашты түзгөнү айтылат маалыматта.

Мамлекеттик башкаруу системинде да эркектердин үлүшү жогору. Мамлекеттик башкаруу органдарында иштегендердин 55,4 пайызы, жергиликтүү өз алдынча башкаруу органдарында иштегендердин 62,3 пайызы эркектер.