Дайындалганына 1 ай боло электе өзгөчө кырдаалдар министри Урматбек Шамырканов кызматтан бошотулду. Президенттик администрация билдиргендей, Шамырканов пара алган деп шектелүүдө. 

– Жаңы министрдин кызматтан кетирилишинин себеби – ал министрдин орун басары кызматында иштеп турганда пара алган деп шектелүүдө. Аталган министрликтин бөлүм кызматкерин кызматынан жогорулатуу үчүн 2025-жылдын жай айларында пара талап кылган. Кызматкер айтылган сумманын жарымын Шамыркановдун электрондук капчыгына которуп бергенин айткан. Шамырканов министр болуп дайындалгандан кийин айтылган сумманын калган жарымын бере албастыгын билдирген соң, анын айтымында, министр кызматкерди Баткендеги бөлүмгө которуп жиберген. Ал президент Садыр Жапаровго арыз менен кайрылган. Башкы прокуратурага арызда айтылгандар тастыкталганын билдирди,- деди президенттин басма сөз катчысы Аскат Алагөзов.

Урматбек Шамырканов 19-февралда министр болуп дайындалган эле. Ага кылмыш иши козголуп, териштирүү уланууда. Анын ордуна Канатбек Чыныбаев министрликтин башчысы болуп дайындалды.