Кыргызстанда калктын орточо 26 пайызы жакырчылык чегинде жашайт. Бул тууралуу БУУнун Бүткүл дүйнөлүк азык-түлүк программасы тарабынан жарыяланган 2026-жылдын март айындагы отчётто айтылат.

Изилдөөгө ылайык, өлкө жарандарынын 41 пайыздан ашыгы толук кандуу тамактанууга мүмкүнчүлүк таба албайт. Ошондой эле калктын 75 пайызы жашоо шартын сактап калуу үчүн терс ыкмаларды колдонууга аргасыз. Мисалы, карыз алуу же саламаттык сактоого кетчү чыгымдарды кыскартуу. Эң оор абал Баткен облусунда байкалууда, бул аймакта жакырчылык деңгээли 40 пайыздан ашат.

Өлкөдө жетишсиз тамактануу маселеси дагы эле актуалдуу бойдон калып жатканы да белгиленет. Беш жашка чейинки балдардын 21 пайызында аз кандуулук (анемия) аныкталган.

– Экономиканын өсүү ыргагы жогору болгонуна карабастан, өлкөдө азык-түлүк коопсуздугу алсыз бойдон калууда. Мунун негизги себептеринин катарына эмгек мигранттары жиберген акча каражаттарына көз карандылык, айыл чарбасынын өзүн-өзү камсыздоо деңгээлинин төмөндүгү, азык-түлүк жана күйүүчү май бааларынын өсүшү, ошондой эле климаттык коркунучтар кирет,- деп жазылат маалыматта.