Иран достук мамиледеги өлкөлөрдүн кемелеринин Ормуз кысыгы аркылуу өтүшүнө уруксат берди. Бул үчүн кемелер коопсуздук талаптарын сактап, Тегеран менен макулдашуусу керектигин чет элдик басылмалар жазышууда. 

Ирандын тышкы иштер министри Аббас Аракчи мындай мүмкүнчүлүк Кытай, Орусия, Индия, Ирак жана Пакистанга берилгенин билдирди. Калган өлкөлөрдүн кемелерине аталган кысык жабык бойдон калууда.

Ормуз кысыгы дүйнөлүк мунай жана газ ташууда маанилүү роль ойнойт. АКШ менен Израилдин кол салуусунан кийин Иран аталган кысыкты жаап, ондогон кемелерге чабуул жасалып, миңдеген кемелер өтө албай туруп калган. Дүйнөлүк мааниге ээ бул кысыктын айынан бир катар өлкөлөрдө күйүүчү май тартыштыгы жаралып жатканын ЖМКлар кабарлашты. Мисалы, Улуу Британиянын айрым аймактарында дыйкандарга дизель майын сатууга чектөө киргизилгени тууралуу маалыматтар чыкты. 

Филиппиндин президенти Фердинанд Маркос өлкөдө күйүүчү майдын жетишсиздигинен улам энергетика тармагында өзгөчө кырдаал жарыялады. Эл аралык басылмалар энергетикалык кризис Жакынкы Чыгыштагы кырдаалдан улам мунайдын баасынын кескин көтөрүлүшү менен байланыштуу экенин жазышты.