Президенттин бизнести негизсиз текшерүү боюнча киргизген мораторийи Салык кызматынын, Бажы кызматынын жана Жарандык авиация кызматынын ишине тиешеси жок. Бул тууралуу экономика жана коммерция министри Бакыт Сыдыков “Биринчи радиого” маек берип жатып билдирди. Анын айтымында, аталган кызматтар тиешелүү иштерин жүргүзүүгө милдеттүү. Бирок башка органдардын текшерүүсүнө 2026-жылдын 31-декабрына чейин тыюу салынат.

Айта кетсек, жыл башында президент Садыр Жапаров “Ишкердик субъекттерге салык көзөмөлүн жүргүзүүгө тыюу салууну киргизүү жөнүндө” жарлык чыгарып, 2026-жылдын 31-декабрына чейин ишкерлерди пландан тышкары салыктык текшерүүлөргө мораторий киргизилгени кабарланган эле. Ага ылайык, мыйзамсыз текшерүүлөргө, кысымга жана кызмат адамдарынын негизсиз кийлигишүүсүнө уруксат берилбейт. Эгерде бул талаптар бузулса же мыйзамсыз текшерүүлөр жасалса ишкерлер прокуратурага кайрылышса болору эскертилген.