Бишкекте “Дем-Нур” медициналык борборунун 70 жаштагы ээси психотроптук заттарды мыйзамсыз сактаган жана саткан деген шек менен кармалганын 26-мартта Ички иштер министрлиги билдирди.

Маалыматка ылайык, ал баңгизаттарга жана алкоголдук ичимдиктерге көз каранды бейтаптарга тиешелүү уруксат берүүчү лицензиясы жок эле дарылоо жүргүзүп, психотроптук заттарды мыйзамсыз сактап, колдонуп жана сатып келген. Клиникага жүргүзүлгөн тинтүүдө 18 ампуладагы психотроптук заттар, 600 ампуладагы жана 16 таңгактагы ар кандай дары-дармектер табылган.

Мындан тышкары шектүүнүн үйүнөн да психотроптук зат табылган. Бул факт боюнча Кылмыш-жаза кодексинин 282-беренеси (Баңгизат каражаттарын, психотроптук заттарды жана алардын аналогдорун сатуу максатында мыйзамсыз даярдоо) менен кылмыш иши козголгон. Учурда аталган кылмышка тиешеси бар башка жактарды аныктоо боюнча тергөө иштери уланууда.