Кикбокс

22-26-март күндөрү Москва облусунун Чехов районунда Дүйнө кубогу өт­кө­рүлдү. Кубандырганы, ага ата ме­кен­дик мушкерлерибиздин ий­ги­ликтүү ка­тышып келиши. Баш-аягы 15 мушкер аттанып, 9у байгелүү орундарга или­нип кайтышты. Арасынан Рашит Аманкулов менен Сталбек Дарканбаев өзгөчө ийгилик жаратып, чемпион аталышты. Бул акыркы мезгилде көрүнбөй кеткен кикбоксчуларыбыздын чоң жеңиши. Ошол жеңишке шыктандырып, даярдаган машыктыруучуларды атап кетпесек болбос. Москвага азаматтарыбызды Александр Воинов, Жанбулат Амантаев жана Маралбек Давлеткуловдор алып барып келди.
Намысты төмөнкү мушкерлер коргошту. “Гермес-профи” (Бишкек) – Айбек Аилчиев (54 килограмм), Айбек Дүйшөнбиев (63 килограмм, 2-орунду ээледи), Алексей Федосеев (63, 2-орун), Мирлан Ибраимов (67), Сталбек Дарканбаев (71, 1-орун), Кумар Жалиев (75, 2-орун).
“Маралбек” (Бишкек) – Нурсултан Токтосунов (51, 2-орун), Авазбек Аманбеков (54, 2-орун), Шамиль Тагиров (57, 2-орун), Рустам Ибрагимов (60, 3-орун), Калыбек Жолдошев (63), Руслан Чекиров (63), Адылбек Болотбеков (81).
“Мухаммед-Умар” (Ош) – Рашит Аманкулов (91, 1-орун).

КЫРГЫЗСТАН ӨЗБЕКСТАН МЕНЕН БЕТТЕШЕТ

Айдын башында олимпиадалык курама командабыз ирандыктарды жеңе албай «Лондон-2012ге» катышуу укугунан ажыраган. Өткөн аптада болсо Кыргызстандын Азия кубогуна катышуу кыялынын ойрону чыкты. Мальдив аралдарында өткөн тандап алуу оюндарында футболчуларыбыз Тажикстан (1:0) менен Мальдив Республикасына (2:1) утулуп, мелдештен учуп кетти (акыркы оюнда Камбоджаны 4:3 эсебинде жеңишкен). Бирок муну менен футболдук жашообуз токтоп калбайт. 31-мартта Куала-Лумпурдагы АФКнын штаб-квартирасында 2014-жылы Бразилияда өтүүчү Дүйнө чемпиондугунун тандап алуу оюндарынын чүчү кулак таштоо аземи өттү. Тагдырдын буйругу экен, 2-баскычтан күрөшкө кошула турган футболчуларыбыз Бразилияга карай сапарында коңшу Өзбекстанга конокко бармай болду. Чүчү кулак биз үчүн ийгиликтүүбү же жокпу? Муну өз ара оюндардын натыйжалары айтып берет. Буга чейин Кыргызстан Өзбекстан менен 4 жолу кез келген жана баары атаандаштарыбыздын пайдасына чечилген. Өзбекстан АФКнын рейтингинде 9-орунда турса, биз 25-катардабыз. Январда Катарда өткөн Азия кубогунда коңшуларыбыз жарым финалга чейин жеткени белгилүү. Биринчи оюн 23-июлда Ташкентте өтсө, Бишкекке чоң майрам 28-июлда келет. Ошентсе да азырынча бул тирешүүнүн бир жакшы жагы бар. Башкача айтканда, узакка баруунун кажети жок (Австралия туш келип калса кантмекпиз?). Үнөм болот...

МУНДИАЛДЫН БААТЫРЛАРЫНАН 100 ПАЙЫЗ НАТЫЙЖА

25-мартта Европада 2012-жылы Украина менен Польшада өтүүчү континенттин биринчилигинин тандап алуу оюндары уланды. Өткөн жылы ЮАРда өткөн мундиалдын байгелүү 3 орунунун жеңүүчүлөрү Испания, Голландия жана Германия өз тайпаларында үстөмдүгүн орнотуп алышкан. Ошондой эле Орусиянын өз тайпасында лидерлик позициясын жоготконун да марттагы тандап алуу оюндарынын башкы окуяларынын катарына кошсок болот. Ал эми кийинки тур оюндары 3-июнда болмокчу.

«А» тайпасы

25-мартта. Австрия – Бельгия - 0:2
26-мартта. Германия – Казакстан - 4:0
29-мартта. Түркия – Австрия – 2:0
29-мартта. Бельгия – Азербайжан – 4:1

«В» тайпасы

26-мартта. Армения – Орусия - 0:0
26-мартта. Ирландия – Македония - 2:1
26-мартта. Андорра – Словакия - 0:1

«С» тайпасы

25-мартта. Словения – Италия - 0:1
25-мартта. Сербия – Түндүк Ирландия - 2:1
29-мартта. Эстония – Сербия – 1:1
29-мартта. Түндүк Ирландия – Словения – 0:0

«D» тайпасы

25-мартта. Люксембург - Франция - 0:2
26-мартта. Босния - Румыния - 2:1
26-мартта. Албания - Беларусь - 1:0
29-мартта. Румыния – Люксембург – 3:1

«Е» тайпасы

25-мартта. Венгрия - Голландия - 0:4
29-мартта. Голландия – Венгрия – 5:3
29-мартта. Швеция – Молдова – 2:1

«F» тайпасы

26-мартта. Грузия - Хорватия - 1:0
26-мартта. Израиль - Латвия - 2:1
26-мартта. Мальта - Греция - 0:1
29-мартта. Израиль – Грузия – 1:0

«G» тайпасы

26-мартта. Уэльс - Англия - 0:2
26-мартта. Болгария - Швейцария - 0:0

«Н» тайпасы

26-мартта. Норвегия - Дания - 1:1
26-мартта. Кипр - Исландия - 0:0

«I» тайпасы

25-мартта. Испания - Чехия - 2:1
29-мартта. Литва – Испания – 1:3
29-мартта. Чехия – Лихтенштейн – 2:0

АВСТРАЛИЯ БАШТАДЫ,
НЕМИС МАШИНАСЫ ЖЕҢДИ

27-мартта автоспорт сүйүүчүлөр үчүн көптөн күткөн күн келип, Формула-1 жарыштарынын сезону старт алды. Алгачкы жарышты Мельбурндун Альберт-парк трассасы кабыл алды. Австралиянын Гран-Присинде жеңүүчү деп учурдагы чемпион германиялык Себастьян Феттель (“Ред Булл” командасы) аталса, орусиялык Виталий Петровдун 3-орунга илиниши сенсация жаратты. Финиш сызыгын 2-болуп «МкЛарен» командасынын өкүлү англиялык Льюис Хэмилтон кесип өттү.
Жарыштан кийин Феттелдин биринчи аракети “Кумардуу Кайлини” эркелетип сылаганы болду. Тактап айтсак, анын болиди дал ушинтип аталат. Буга чейин ал “Таттуу Лиз”, “Азгыруучу Мэнди” менен көңүл ачкан. Андыктан ал: “Кайли экөөбүздүн мамилебиз жакшы башталды”,- деп тамашалады. Ал эми көпчүлүктү таң калтырган Петров: “Ийгиликке жетишиме мыкты старт алганым себеп болду”,- деп билдирүү жасады. Эмки жарыш 10-апрелде Малайзияда өтөт.

Базарбек Абдураимов
sport@super.kg