Жазында витаминге бай чөптөрдөн даамдуу тамак жасаганга болорун баары эле билбесе керек. Ырчы Бегимай Эсенгулова беде, алабата (шоро), жалбыз жана ат кулактан жасалуучу даамдуу токочтун рецебин сиздерге тартуулайт.

КЕРЕКТЕЛҮҮЧҮ АЗЫКТАР:

• Көк чөптөр (беде, ат кулак, жалбыз, шоро, пияз ж.б.)
• Өсүмдүк майы
• Ун
• Туз, калемпир, мурч

ЖАСОО ЫКМАСЫ:

1. Алгач көк шиберден керектүү чөптөрдү таап, терип алуу керек.
2. Терилген көктөр таза жуулуп, майда тууралат.
3. Казанды майлап, кызыгандан кийин тууралган көк чөптөр куурулат.
4. Куурулган көккө май, туз, калемпир, мурч татымына карата кошулуп, аралаштырылат.
5. Камырды жууруп, тындырган соң майда бөлүктөргө бөлүп, ар бирин тегерек кылып жайып алуу керек.
6. Камырдын бир бурчуна даяр болгон азыкты салып, эки четин тегеретип бекитүү абзел.
7. Казанды кызытып, токочтун эки жагын тең кактап бышыруу керек.

• Токочтун ар бирин бышырууга 2-3 мүнөт гана керектелет.
• Кооздук үчүн салат жалбырагы, укроп, көк пиязды колдонсо болот. Мына ушундай жол менен биздин токоч да даяр болду.

ЭСКЕРТҮҮ!

• Чөптөрдүн жаңы чыккандарын гана терүү керек. Сөңгөгү катып калганда даамы ачуу боло баштайт.
• Ат кулак кычкыл болот. Ошондуктан кычкылды жактырбагандар азыраак пайдалануусу кажет.

ЧӨПТӨРДҮН ДАРЫЛЫК КАСИЕТИ:
Биз колдонгон көк чөптөр витаминге бай экенин баса белгилөө керек. Мисалы:

• Бедеде эфир майы, С жана В витаминдери өтө көп. Анын кайнатмасын аллергияга каршы дары катары колдонуп келишет. Андан тышкары беденин гүлдөрүн күйүктө да пайдаланышат.
• Ат кулак тамак сиңирүүгө пайдалуу жана канды көбөйтүүчү касиетке да ээ. Жаш балдардын боюнун өсүшүнө да жардам берет.
• Алабата (шоро) белокко бай өсүмдүк болгондуктан, тырмак жана чачтын өсүшүн жакшыртат. Аны кургак нан деп атап коюшат, анткени калориялуу.
• Жалбыз жүрөк айланган учурда жакшы даба болуп берет. Эт ысыганда, муундар ооруганда жана депрессиядан арылууда колдонулат.

Салтанат Мукасова
kenesh@super.kg