Дайыр Исмадияровдун “Кара көзүм” аттуу ыры чыккандан тарта анын күйөрмандар талаасы кеңейди. Аны менен катар ырчы тууралуу ар кандай сөздөр да көбөйдү. Деги эле учурда Дайыр эмнеге байып, эмнеге суусап тургандыгын сураштырып көрүүнү чечтик. – Куш келиптирсиң, Дайыр. Алгач телефондон “бул эмне кылганың?! Сенден мындайды күткөн эмеспиз. Бул жакта сени бирөө болушунча шыбаптыр. Редакцияга тез келип калчы” деп тамашаласак, учуп-күйүп жетип келдиң. Жашырган бир нерсең бар го дейм?..
– Алгач өзүмө “эмне кылдым эле?” деген суроо берип, жообун таба алган жокмун. Таанымал болгондон кийин артыңдан ар кандай сөздөр ээрчийт экен. Дагы кимиси эмне деп салды, барганда билермин деп жетип келбедимби. Өзүм да бирөөнү тамашага салганды жактырам. Бир жолу 5-кабаттагы досумдукуна чыксам, үйүндө жок экен. Эшикте күтүп турсам, дагы бир досум келип калды, тигини издеп. “Үйүндө бекен?” дегенинен “ооба” деп койсом, чуркап чыгып кеткен. Бир убакта келди бышылдап, кызаңдап да алган. Кебетесин көрүп, аябай күлгөн элем.
– Сөзүңө караганда өзүңдү популярдуу деп эсептейсиң...
– Жок, антип деле эсептебейм. Бирок популярдуу болоюн деп катуу аракеттенүүдөмүн. Алдыда дагы бир клип тарттырып жатам.
– Продюсериң Канат Кадыржандын сен тарапка таш ыргытканына караганда экөөң катуу араздашкан окшойсуңар?
– Ооба, продюсерим мен жөнүндө бир топ туура эмес маалыматтарды таратып жүрөт. Чынында, анын деңгээлине түшүп, каяша айткым келбейт. “Эки тоо көрүшпөйт, эки адам көрүшөт” дегендей, жер тоголок. Балким, кайра иштешип калышым да мүмкүн.
– Аны менен иштешпей калгандан кийин чыгармачылыгың аксадыбы?
– Аксап калган жок. Бирок быйылкы жыл мен үчүн оор да, жемиштүү да болду. Оор дегеним, гастролдорго, ар кандай сүйлөшүүлөргө өзүм чуркап, жаным тынбады. Жакында Орусиянын шаарларына концерт коюп келейин деп турам. Буга чейин клип тарттырууга, ыр жаздырууга акча коротуп жүрсөм, азыр жемишин көрө баштадым.
– «Кайдасың?» деген жаңы клибиңде жалгыздыктын азабын тарткан жигиттин образын жаратыпсың. «Неужели» жалгызсың?..
– Буга чейин тартылган клиптериме өзүм тараптан көп сын-пикирлер жаралчу. Бул клип өзүмө абдан жакты. Чыгармачылыгымдын жакшы түшүмү деп айта алам. Клиптин мазмуну да терең болду. Чыгармачыл адамдар жумушун 1-орунга, жеке жашоосун 2-орунга коюп жүрүшкөнүн көп байкайм. Мен алардын бири болчумун. Клибим акжолтой болду окшойт, тартылып бүтөрү менен өз сүйүүмө жолуктум. Учурда сүйүүгө мас болуп жүргөн кезим.
– Сени мас кылган сулуунун атын билсек болобу?
– Сүйүктүүм белгилүү ырчы кыз. Атын атабай эле коёюн, ал “азырынча ачыкка чыкпай туралы” деп суранууда. Чынын айтсам, буга чейин аны жактырчу деле эмесмин. Жакында гастролго чогуу барып келдик. “Алыскы жолдо кимдин ким экенин билесиң” деген сөз чын экен. Анын жөпжөнөкөй, жан дүйнөсү ымыркайдыкындай таза экенин билип, анан да макияжсыз сулуулугуна суктанып, сүйүүмдү билдирдим.
– Буга чейин башка кыздар менен ээрчишип жүргөнүңдү көзүм чалды эле. Анан да сенин дарегиңе “бабник” деген сөз айтылып келет экен...
– Чынында, көзүм ойноктоп, кыз жандуумун. Азыр жок десем, эртең эле ошол кыздар бетиме түкүрүп кетишери анык. Ооба, көп кыздардын жүрөгүн жибиттим, ээрчиттим дегендей. Бойдок кез – ойноок кез, аны моюнга алам.
– Учурдагы сүйүүңдү «чындап сүйдүм, түбөлүктүү» деп айта аласыңбы?
– Буга чейин канча кыздар менен мамиле түздүм. Бирок жыйынтык чыккан жок. Азыр эрте эле ооба деп өзүмө ала мышык болбой турайынчы. Бирок чындап сүйдүм деп айта алам. Жүрөк кургур бир башкача болуп жүрөт.
– Ушуга чейин элге айтпаган сырларыңдын бирин ача аласыңбы?
– Мм-мм... Буга чейинки интервьюларда «4 бир тууганмын» деп айтып келчүмүн. Бирок, чынында, мен 13 бир тууганмын. Атамдын кийинки турмушундагы балдарын бир тууганым деп эсептечү эмесмин. Ыраматылык атам быйыл каза болду. Аны акыркы сапарга узатып жатканда балдарынын баары зыркырап ыйлап жатканын көрүп, “туура эмес кылыптырмын, бир атанын каныбыз” деген ойго келип, атама болгон таарынычымдын баарын чийип салдым. Азыр бир туугандарым көп экенине сүйүнөм. Бат-бат байланышып турушат. Ушул жерден бир нерсени айта кетейинчи, апамдын атамдан көңүлү калса да, “туугандарыңар менен катышты үзбөгүлө” деп той-топурларга кыйнап жөнөтүп жиберчү. Баары бир тууган керек экен.
– Жашоодогу ар кандай кырдаалдардан улам адам депрессияга түшөт. Депрессиядан кантип чыгасың?
– Анчалык катуу депрессияга кабыла элекмин. Өзүмдү-өзүм дарылай алам. Мисалы, мага муздак душтун алдында туруу өтө жардам берет.
– Бир жолу бизге берген интервьюңда “мектепте орусчаны мен эле кыйын билчүмүн. Калгандары оң кулак десе, сол кулагын көрсөтүшчү” деп айтканыңда классташтарың чалып “Дайыр – мактанчаак” деп жинденишкен. Чын эле мактанчааксыңбы?
– Кээ бир адамдар болгон нерсесин жашыра беришет. Ал эми менин ичиме эч нерсе батпайт. Байпак сатып алсам да айта берем. Бирок апыртып, кошумчалап, кооздобойм. Балким, болгонду болгондой кылып айтканым мактанчаактыкка жататтыр. Ал эми классташтарым бекер эле таарынышат. Ошондо орусча ойлонуп, кыргызча жооп берип салсам керек.
– Кызыктуу маегиңе рахмат.
ДАЙЫР ТУУРАЛУУ БУГА ЧЕЙИН АЙТЫЛБАГАН НЕРСЕЛЕР
– Толкун урган жээкти карайсыңбы же купальникчен кыздыбы?
– Мындай да, көл жана купальникчен кыз. Мен чалкалап жатам… Анан бул жерге кичине шамал жетишпей турат. Эгер шамал болсо, кыздын купальниги, балким, чечилип кетет, ха-ха...
– Эротикалык тасмага тартылууга сунуш түшсө...
– Тартылмакмын. Өз келбетимден уялбайм.
– Уят сөздөр “менюңда” барбы?
– Бул жагынан апамдын таягы катуу болгон, ошондуктан сөгүнбөйм. Кээде достор арасында атайын тамашага салып сөгүнүп калсам, “сага жарашпайт экен, жөн эле сүйлөчү” деп калышат.
– Гейлерге болгон мамилең...
– Андайларды кемсинтип, саламдашпай койгондун өзү туура эмес. Гейлер менен иштешип эле жүрөм.
– Кыз менен таанышканда юбкасынын кыскасына карайсыңбы же?..
– Көзү, анан буттары өзү эле көрүнөт.
– Төмөнкүлөрдүн ичинен эмнеге дитиң барбайт: Эл көзүнчө өбүшүү, стриптиз бийлөө, досуңдун кызын тартып алуу.
– Досумдун кызын тартып албайт болчумун.
– Эң жаман адатың...
– Пайдасы жок эле нерселерди сатып ала бергеним. Жакында Новосибирсктен 3 миң рублга матрёшка сатып алгам. Москвага келсем, андан жакшысы арзан эле турат экен. Азыр ошол матрёшканы көргөн сайын жиним келе берет.
– Косметика колдоносуңбу?
– Албетте, ха-ха... Мурда сахнадан аппак көрүнөйүн деп шыбанчумун. Анан терим бузула баштады. Азыр ошол себептен капкара бойдон деле чыга берем.
Жылмайып коюңуз! 
Спорт Ордосунун буфетинде иштеген сатуучу курбусуна:
– Ушул биздин ырчылар орусча жакшы сүйлөй алышпайт. “Мне одно кофе” деп сурашат. Дайыр Исмадияров деген ырчы гана “мне один кофе” деп кайрылат,- деп сөзүнүн аягына чыга электе Дайыр кирип келип:
– Здрассти, эжешка. Мне один кофе и один булочка,- дептир.
Бахияна Сатылганова
star@super.kg
3
