Президенттик шайлоо жакындаган сайын калың элдин колдоосуна ээ болууга ашыккан саясатчылардын “мен акмын, сен карасың” деп бири-бирин күнөөлөмөйү кызыды. Андайлардын бири Камчыбек Ташиев Июнь коогалаңы боюнча Убактылуу өкмөттү күнөөлөсө, Башкы прокуратура аны “бейбашсың” деп кылмыш жообуна тартууга бел байлады.

14-июнда Ак үйдү эрежесиз мушташтын аренасына айланткан депутаттардын бири Камчыбек Ташиевди кылмыш жоопкерчилигине тартуу үчүн башкы прокурор Аида Салянова анын кол тийбестик макамын алып салуу сунушун парламентке жолдоду. Эсиңиздерде болсо, 31-мартта парламент төрагасы Ахматбек Келдибековдун иш бөлмөсүндө Камчыке партиялашы, дунган улутунун өкүлү Бахадыр Сулаймановду токмоктоп, натыйжада депутаттык мандат алганына бир жума эле болгон эл өкүлүнүн баш мээси чайкалып ооруканага жатканы маалымдалган.
Сотмедэксперттер тарабынан “Ташиев Сулаймановдун денесине оор жаракат келтирген” деген аныктама берилип, кылмыш иши козголуп, бейбаштык боюнча айып тагылууда. Козголгон кылмыш иши 234-беренеден (бейбаштык) 104-беренеге (адамдын денесине атайы оор жаракат келтирүү) өтүп кетүүсү да мүмкүн.
Камчыбек Ташиев “бул иш алдыдагы президенттик шайлоого мени катыштырбоо максатында жасалып жаткан саясат” деп баалап, Кыргызстандын элине өзүнүн кайрылуусун жолдоду.
Анда 2010-жылдын апрель жана июнь айларындагы кандуу окуялардын бир да күнөөкөрү бүгүнкү күндө жоопкерчиликке тартылбагандыгы жана Роза Отунбаева башында турган бийлик күнөөлүүлөрдү жоопко тартуудан качып жаткандыгы айтылат.
Ошондой эле ал: “Өлкөнүн бардык аймагындагы эл менен жолугушуу учурунда алар Апрель жана Июнь окуяларынын күнөөкөрлөрүн таап, жазалап, акыйкаттуулук орнотулушун талап кылышты”,- дейт.
Бул талаптарды ал парламентте ачык айтып чыккандыгы үчүн бийлик Акаев менен Бакиевдин ыкмасын колдонуп, ага жок жерден кылмыш ишин токуп иле салууга аракет кылып жатат деген ойдо. Ошондой эле “7-апрелде аларга ишеним артып, Бишкектин көчөлөрүнө чыккан адамдарды сактап кала албагандыгы үчүн жана түштүктөгү кандуу окуялардын чыныгы жагдайлары ачыкка чыгып кетишинен коркуп, бийлик элдин көңүлүн ушундай жол менен башкага буруп жатат” деп белгилеген. Кайрылуусунун аягында өлкөнүн ар кайсы аймактарында өзүн колдоо үчүн нааразычылык акциясына чыгууга камынып жаткандарды тынчтанууга, өлкөбүзгө кыйынчылык менен орногон стабилдүүлүктү сактоого чакырды.
Бул маселе жакынкы күндөрү парламенттин жыйынында каралмакчы. Эгер башкы прокурордун сунушу депутаттар тарабынан колдоо тапса, Камчыбек Ташиевге карата козголгон кылмыш иши сотко өткөрүлүп берилмекчи. Сот ишти Сулаймановдун пайдасына чечсе, анда Ташиев депутаттык мандатынан да ажыратылат.