Бирде айдагы кызга кол сунганы туурасында, бирде секелек кыз жөнүндө ырдаган Мирбек Иманбеков нарындык күйөр­мандарына ырларын арнап келди. Ошол сапарында ырчы Жумгалдан Кочкорго келаткан жолдо үч саат дайынсыз жоголуп ке­­тип, чогуу келаткандарды сарсанаа кылган. Көрсө, ал ошол жердеги камыштын арасынан жакшы көр­гөн жан­дыгы коёндорду көрүп калып, аларды кармагысы келип артынан кууп кеткен экен. Ары-бери чуркап жүргөн ырчынын карааны бийик камыштан улам досторуна көрүнбөй кал­ган. Коёндон да ырчы күлүкпү, айтор, үч сааттан кийин кийимин баткак кылып кайтып келген Мирбек бир коёнду колтуктай келиптир.