Эрлан Андашев үстүбүздөгү жылдын башынан тарта продюсер катары көмөк көрсөтөм деген “Манас” радиосунун ди-джейи Айбек Акматов менен иштеше баштаган. Июндун башында Эрлан продюсери менен “Сүйүп калдым, кантейин?” деген ырына клип тартышкан. Мына ошондон бери Эрлан Айбекти издеп таппай жүрөт. Телефондоруна чалса, экөө тең өчүрүлгөн. Үйүнө барса, эшиги бек. Жумушундагылар да дайынын билишпейт. Нарындагы ата-энеси менен байланышса, алар Бишкекте экенин айтышат. Алгач “эми бир жерде жүрсө керек” деп кабатырланбаган Эрлан азыр сарсанаа болуп, милиция кызматкерлерине кайрылууну ойлой баштады.