10-октябрь – Шайлоо күнү өлкөбүздүн саясий өнүгүшү гана эмес, футбол боюнча улуттук чемпиондуктун тагдыры да чечилип жатты десек болчудай. Бул жекшембиде кочкор-аталык “Нефтичи” бишкектик “Алганы” кабыл алып, артка чегиндирди (оюн үй ээлеринин пайдасына 2:1 эсебинде чечилген).
Ага параллель түрдө Кантта өткөн “Абдыш-Ата-Дордой” тирешинде “нефтичинин” атаандаштары өз ара тең чыгып (2:2) упай жоготуусунун натыйжасында кочкор-аталыктар үчүн чемпион болууга зор мүмкүнчүлүк түзүлдү. Эми “Нефтичинин” чемпион болушу үчүн калган 2 оюнда (17-октябрда “Абдыш-Ата” менен, 24-октябрда “Шер” менен) 4 упайга ээ болуунун өзү жетиштүүлүк кылат. Кошумчалай кетсек, бомбардирлер жарышында да “Нефтичинин” чабуулчусу Талай Жуматаев 14 голу менен алдыга суурулуп чыккан.