Волейбол боюнча Орусиянын кыздар курама командасы бул ирет да дүйнө чемпиону наамын коргоп кала алышты. Японияда болуп өткөн Дүйнө биринчилигинде финалдык оюн Орусия менен Бразилия командаларынын ортосунда өттү. Айыгышкан 5 партиялык беттеште орустун кыздары 3:2 эсебинде жеңишке жетишишти. Ошентип, 2006-жылы жеткен ийгилигин дагы бир ирет кайталашты. Баса, анда да финалда Бразилия командасын багындырышкан эле.
3-орунду мелдештин кожоюндары – япондуктар алып кетишти. Алар 3-орунга болгон таймашта АКШнын командасын 3:2 эсебинде жеңишти.
Мелдештин эң баалуу оюнчусу болуп орусиялык Екатерина Гамова табылды. Спортчу мелдеш жүрүшүндө өз командасына 200дөн ашык упай алып келген.