Сыймык Бейшекеев учурда толкунданып турган кези. Себеби анын ысымы жаңы курулуп жаткан 6 кабаттуу ак өргөөгө ыйгарылды. Баш калаабызда жайгашкан үйдү куруп жаткан Бакыт мырза Сыймык Бейшекеевге кайрылып: “Үй курайын деп турам. Ал жерде жалаң сиздин чыгармачылыгыңызды сыйлаган инсандар түтүн булатышат”,- деген. Буга ырчы макул болгон. Куруучулар учурда үйдүн 90 пайыздык иши бүтүп калганын, жазга жакын толугу менен аягына чыгарын айтышты.
Ал эми ырчы: “Өргөөгө ысымымды коёбуз дегени мен үчүн чоң сыймык. Буюрса, жазында салтанаттуу түрдө ачып, уулума же Авазга ушул жерден үй алып берем деген ниетим бар”,- дейт.
Үйдү көрүү үчүн барганыбыз­да ал жерден Сыймык мырза жана анын бир нече күйөрмандарына кезиктик. Алардын баары сүйүк­түү ырчысы Сыймык Бейшекеевдин урматына коюлганы үчүн ушул үйдөн квартира сатып алмакчы болуп турушканын кабарлашты.