Жакында Бишкек шаарында эки жигит 53 жаштагы таксисттин автоунаасын тартып алуу максатында ага бир нече ирет бычак сайышкан. Таксист оор жаракат алып, ооруканага жеткирилген. Бактысы бар экен, тирүү калды. Ал эми бул кылмышка шектелгендер кармалып, иликтөө иштери жүрүп жатат.

КАНСЫРАГАН ТАКСИСТ КАЧЫП КУТУЛГАН
Иликтөөгө таянсак, окуя төмөнкүчө болгон. 14-августта түш ченде Чүй облусунун Новопокровка айылында бир нече жаштар жолугуп, борбор калаадагы Туңгуч кичи району тараптагы темир жолго келишет. Ал жерде аркы-беркини сүйлөшүп отуруп сыра ичишет. Анан ар кимиси ар кайсы жакка тарап, Константин, Юрий, Андрей аттуу жигиттер үйлөрүнө жетип алуу үчүн такси токтотушат. 3 жигитке токтогон таксист Садыбакас Чыңгышбаев өзүнүн Ауди С4 автоунаасы менен кээде кардар ташычу экен. Сүйлөшүүлөрдөн кийин таксист жигиттерди 150 сомго Ысык-Ата районунун Новопокровка айылына жеткирмекчи болот.
Аталган айылдын бир көчөсүндөгү үйүнө жеткенде Константин акча алып чыгып таксистке төлөйт. Ал эми Андрей менен Юрий дагы акча кошуп берели деп ошол эле такси менен Бишкектин «Аламүдүн» базары тарапка айдатышат. Ортодо Андрей үйүнө кирип, жумушуна керектүү аспаптары салынган баштыкты жана бычак ала чыгат. Экөө жолдо баратып таксисттин көзүн тазалап, автоунааны тартып алууну сүйлөшүшөт. Алгач жип менен муунтмакчы болушкан, бирок кайра бычак саюуга токтолушат.
Караңгы көчөлөрдүн бирине киргенде Чоң Чүй каналына жакын жерден токтоттуруп, түшмөкчү болгондой түр көрсөтүшөт. Автоунаа токтогондо бычагын даярдап турган Андрей эч капарсыз отурган таксисттин мойнуна 2, далысына 4 ирет бычак саят. Мындай нерсени күтпөгөн Садыбакас кылмышкерлердин колунан эптеп бошонуп чыгып, чоң көчө тарапты көздөй качып жөнөйт. Андрей артынан кууп баратканда ошол көчө менен келе жаткан автоунаанын жарыгы көрүнүп, кайра артка качууга мажбур болот. Из жашырып кетүү максатында экөө караңгы көчөлөрдү аралап Аламүдүн районундагы айылдардын бирине барышат. Андан соң эки тарапка бөлүнүп кетишет. Эртеси кылмышка шектүүлөр Свердлов
РИИБинин кызматкерлери тарабынан кармалган.

«ТАКСИСТ СҮЙЛӨЙ АЛБАЙ КАЛЫПТЫР»
Бишкек шаарынын Свердлов РИИБинин кылмыш иликтөө бөлүмүнүн оперкызматкери АКЫЛ БОЛОТБЕКОВ:
– 14-августтан 15ине караган түнү саат 12:30 чамасында Свердлов РИИБинин нөөмөт бөлүмүнө таксистке кол салуу болгондугу тууралуу маалымат түштү. Биз окуя болгон жерге, анан ооруканага бардык. Таксист сүйлөй албай калыптыр. Ал бизге кылмыш кай жерде болгонун, кай жактарга барганын картадан көрсөтүп берди. Бирок кылмышка шектүүлөр башка жакка качып кетишкен экен. Оперативдүү издөө иштеринин натыйжасында эртеси кылмышка шектүүлөр 1990-жылы туулган Карпов Юрий Николаевич жана 1997-жылы туулган Пацура Андрей Андреевич аттуу Ысык-Ата районунун Новопокровка айылынын тургундары кармалышты. Алар алгачкы суракта эле кылмыштарын мойнуна алышты. Кылмышка шектүүлөрдүн бири Юрий Карповдун мурун уурулук фактысы боюнча соттолуп чыкканы аныкталды. Учурда бул факт боюнча Свердлов РИИБинин тергөө бөлүмү тарабынан Кылмыш жана жаза кодексинин 28-97-беренелери (киши өлтүрүүгө аракет кылуу) менен кылмыш иши козголгон. Кылмышка шектелип кармалган Бишкек ШИИББинин убактылуу кармоочу жайына киргизилип, иликтөө иштери жүрүп жатат.

Нурбек Абдыкадыров
koom@super.kg