Жакында өлкөбүздө өзгөчө кылмыштын бети ачылды. Бул сапар динге ашыкча берилген адамдар акыр заман келгиче өлөлү деп өз жандарына кол салышкан. Акылга сыйбай турган бул окуя эч кандай динде жок ырым-жырымдар менен коштолгон.

КОРООДОН ТАБЫЛГАН СӨӨК
Мындан 2 жыл мурун киши өлтүрүү фактысы болушу мүмкүн деген маалымат Жалал-Абад облустук милиция кызматкерлерине түшөт. Бул фактыны из кубарлар иликтеп, кийин аларга Чүйдөгү кесиптештери кошулат. 2 жыл мурун жоголгон Курсантбек эмгиче өлгөн болуш керек деп ойлошот, эми муну текшериш керек эле. Бул чиеленген окуя акыры Аламүдүн районунун Пригородное айылына алып келет.
Үстүбүздөгү жылдын 25-августунда Бишкек шаарынын четиндеги бул айылда жайгашкан үйдүн короосунан төшөккө оролуп көмүлгөн кишинин сөөгүн табышкан. 80 сантиметр тереңдикте көмүлгөн сөөк чирип кеткен. Иликтөөнүн жүрүшүндө белгилүү болгондой, сөөк 2011-жылдын ноябрь айында көмүлгөн. Маркумдун өздүгү аныкталып, ал 1977-жылы Жалал-Абад облусунун Базар-Коргон районунда туулган Курсантбек Ташбаев экендиги билинет. Көп өтпөй Ташбаевдин өлүмүнө шектелип анын аялдары жана өгөй уулу кармалган. Кылмышка шектүүлөрдүн бирин Орусиядан учуп келгенде Бишкектин аэропортунан кармашат. Андан соң башкалары да кармалып, окуя кандай болгону билинип отурат.

АЯЛДАРЫН ӨЗҮНҮН АРТЫНАН ӨЛҮҮГӨ ҮГҮТТӨГӨН
Иликтөөнүн жүрүшүндө белгилүү болгондой, окуя төмөнкүчө болгон. Маркум Курсантбек Ташбаев 2 аялы жана өгөй уулу менен чогуу Аламүдүн районунун Пригородное айылында батирде жашачу. Ал динге аша чаап берилген адам болуп, аялдарын да ошого үгүттөп келген. Кылмышка шектелип кармалгандардын айтымында, ал жакында акыр заман болот деп ага өзүн да, жакындарын да даярдаган. Бирок алар күткөн акыр заман «кечигип», өздөрүнүн жандарын өздөрү кыймакчы болушат. 2011-жылдын 27-ноябрында Курсантбек өз жанына кол салат. Денесинин бир топ жерине бычак сайып, электр мешине токко да урунуп көрөт. Бул аракетинен да натыйжа чыкпаганда жанында отурган өгөй уулу жардамга келген.
Анын эртеси үчөө да үй-бүлө башчысы айтып дайындагандай өздөрүн өлтүргөнгө аракет кылышат. Кечинде жатарда газды ачып коюшат. Бактыга жараша үчөө тең аман-эсен ойгонушат. Анан бирөөсү чай кайнатмакчы болуп газды күйгүзөт. Ошол убакта газ толгон бөлмөдө жарылуу болот. Бирок бул сапар да күйүк алышканы менен баары тирүү калышат. Андан соң жашагысы келишкенби, айтор, өмүрлөрүнө кол салбай эле артын тазалай башташат. Ал эми туугандарына Курсантбекти «дааватка кеткен» деп коюшат.

«АЛЫСКА КЕТТИ ДЕП КОЙ ДЕГЕН»
Кылмышка шектелип кармалгандар «Курсантбектин аркы дүйнөгө кетиши үчүн жөн гана жардам бергенбиз» деп көрсөтмө беришүүдө.
Гүлбара Кимсанова:
– Бизди аябай катуу кармачу. «Кудай десеңер мага тийишпегиле, бүгүн бул иш ишке ашышы керек» деп эле өзүн-өзү кескиледи. Өлбөй калып, «жок, бул иш болуш керек» деп дагы кескиледи. Кан көп кетип, бирок жаны чыкпай жатканда өлгөнгө жардам берип койгула дегенсип ымдады эле, Апсамат (маркумдун өгөй уулу) барып кекиртегин кесип салды. Сыртта чуңкур бар болчу, «Ушул жерге кичине казып көмүп койсоңор болот, Жараткан биздин сөөктү калтырбайт» деп өзү айткан жерге көмүп койдук. Туугандары издеп деле келген жок. Бирок баламды окутам деп ага документ жасатканы айылга барганымда «Арабияга кетти, келбейт» деп айтып койдум. Себеби өзү ушинтип айтып койгула деген. Андан соң иштеп келейин деп Москвага кеттим.

«КУРСАНТБЕКТЕН БААРЫ АЛЫСТАП КЕТКЕН»
Перизат Керимбекова:
– Курсантбек өтө эле Кудайга жакын киши болчу. Куранды кармап алып мага «Эгер тозокко баргың келбесе, мени менен чогуу жүр» деди. Ошентип акыр заман келет деп бир жыл даярданып жүрдүк. Анан бир ай бою эч жакка чыкпай, бизди да чыгарбай кармап отурду. Бизден сырткары да күйөөсү жок кыздар бар эле (ред. милиция кызматкерлеринин айтымында, алардын кылмышка тиешеси жок), аларга да «Кудайга терең ишенсеңер, биз менен чогуу жүрөсүңөр» деп үгүттөгөн. Бир ай бою акыр заманды күттүк, болбой койгондо «Мен бул жашоодо жок болушум керек, тоскоол болуп жатат окшойм. Балким, мен жок болсом, акыр заман келет болуш керек» деп өзүн-өзү өлтүрөм деп чыкты.
Апасына телефон чалып, «Мен алыс жолго кетип жатам, менден кетсе кечирип койгула» деп айтты. Биз «өлбө» деп аябай жалдырап сурансак да болбой койду. «Жаратканга терең ишенсеңер мага тийбегиле, ишенбесеңер, анда өз билгениңерди кылгыла» деди. Анан биз Жаратканга терең ишенгендиктен, Кудайга жакын болуп жашап жүргөндөн кийин аягына чейин жакын болсун деп ойлоп, эч нерсе кылбай карап отурдук. Башкысы, жаны бейишке түшсө болду дедик.
Бизди да аябай үгүттөгөн окшойт, милицияга кайрылуу тууралуу ой да болбоптур. Ал тургай ушул күнгө чейин эмне болуп кеткенин түшүнбөй жүрөм. Туугандары сураганда «алыска кеткен» деп койдук. Алар мурунтан эле катташпай калгандыктан, анчалык деле сураштырышкан жок. Себеби Курсантбек туугандарына, досторуна «Кудай жолунда жүрүш керек, силер туура эмес кылып жатасыңар» деп айта берип, баары алыстап кеткен.

«ИЛИКТӨӨ УЛАНЫП ЖАТАТ»
Чүй ОИИББинин маалымат кызматынын кызматкери АЙБЕК АРЗИМАТОВ төмөнкүлөрдү билдирди:
– 2013-жылдын 25-августунда Аламүдүн районуна караштуу Пригородное айылындагы бир үйдө 1977-жылы Базар-Коргон районунда туулган Ташбаев Курсантбек Чолпонбаевичтин сөөгү табылган. Бул кылмышка шектелип 1975-жылы туулган Перизат Керимбекова, 1980-жылы туулган Гүлбара Кимсанова жана 1995-жылы туулган Апсамат Керимбеков аттуу жарандар кармалып, убактылуу кармоочу жайга киргизилди. Бул факт боюнча Аламүдүн РИИБинин тергөө бөлүмү Кылмыш жана жаза кодексинин 97-беренеси (киши өлтүрүү) боюнча кылмыш ишин козгогон. Тиешелүү соттук-медициналык экспертизалар дайындалып, учурда иликтөө иштери улантылып жатат. Кылмышка шектүүлөр Ташбаевди өзүн-өзү өлтүргөн деп көрсөтмө беришүүдө, алар чын айтып жатабы же башкача болгонбу, тергөөдө билинет.

Нурбек Абдыкадыров
koom@super.kg