Мындан жарым жыл мурун кеңсебизге келип өнөрүн көрсөтүп кеткен Азамат Бараков «Украина таланттары» шоу-сынагына Кыргызстандын атынан барып, уникалдуу трюктары менен жарым финалга чыкты. Калыстар тобундагы профессионал боксчу Вячеслав Узелков күрөктү Азаматтын башына чаап сындырды. Аны менен эле токтоп калбай, Азамат залдагы бирөөнү чакырып тиши менен бел курунан көтөрдү. 3 кабат көмөч казанды бүктөдү. Кыскасы, калыстардын оозун ачырган Азамат бизге Украинага сапар алар күнү маек берип кетти.

Туулган жылы, күнү – 1990-жыл, 9-январь
Туулган жери – Каракол шаары
Үй-бүлөлүк абалы – Үйлөнгөн, 1 уулу бар, экинчиси жакында төрөлөт
Салмагы – 62 кг
Бою – 176 см

– Трюктарыңды көрүп калыстар таң калышты. Арык жигиттин колунан балбандар жасачу иштин келерине ишенүү кыйын экен...
– Башында чымыр денелүү, олбурлуу адамдар жасай албаган ишти кылганыма өзүм да таң калгам. Өмүрүмдө спорт менен машыккан эмесмин. Тамеки чегүү боюнча тажрыйбам 5 жыл.

– Калыстар сени абдан колдогону билинип турду, ушундай кабыл алууну күттүң беле?
– Долбоор мага көптөгөн сюрприздерди алып келди. Баратканда 2 күн уктаган жокмун. Анткени жол жүргөндө уктай албайм. Башталарга жакын жарым саат уктап алайынчы десем да уруксат бербей коюшту. Уктап калбасын дешти окшойт, кичине виски ичирип коюшту. Чынын айтсам, ал жерден мен болгону жарым күчүмдү гана көрсөттүм.
Украинада жасаган трюктарым – менин эң оңой аракеттерим. Украиндер менден мындай трюктарды күтүшкөн эмес, аябай таң калышты. Жарым финалда жасай тургандарым андан да оорураак. Башыма 50-60 килограммдык таштарды коюп темир менен чаап сындырышат. Мен бул трюкту жасагандан эмес, көрүүчүлөрдөн коркуп жатам, аларды чочутуп албасам экен дейм.

– Күч менен урулган соккудан ден соолугуң начарлашы мүмкүн эмеспи. Мындай трюктардан кийин ооруканага текшерилесиңби?
– Өмүрүмдө бир да жолу ооруканага кайрылган эмесмин. Бир да жолу мээм чайкалган эмес, ишенбегендер текшертип көрүшсүн.

– Көмөч казандарды кантип тандайсың, жукаларын аласыңбы?
– Совет мезгилиндеги калың көмөч казандарды мен кыйын дегендер да бүктөй албай коюшкан. Аларды мен 7-8 жолу бүктөгөм. Ошондой таппай жүрөм. Сынактарда бүктөп жүргөндөр кытай көмөч казандары.

– Бала кезден эле күчтүүсүңбү?
– Бала кезде алсыз, арык бала элем. Анан уйкучу болчумун, сабакка дайыма кечигип барчумун. Алтынбек деген досум бар, ал 1-атаман эле. Анын жанында жүргөндүктөн, мага эч ким жекеме-жеке чыккан эмес. Мен негизи тайларымдын колунда өстүм. Чоң күчкө ээ болушумду тай жагым өздөрүнө байланыштырышат. Тайларымдын уруусу – коңурат. Ушул уруудан чыккан Бөрү деген таятам баатыр болуптур. Калмактардын атагы чыккан баатырларын жыккан карылуу, чымыр киши экен кезинде. Ал деле мен сыяктуу арык, бою орто болгонун угуп калам. Ал жөнүндө жазылган китеп дагы бар.

– Кайсы окуу жайды бүткөнсүң?
– Окууга тапшырып, бирок шартка байланыштуу окуумду таштап, иштөөгө туура келди. Башымдан көп кыйынчылыктар өткөн. Андан кийин борборго келип, арак чыгарган заводдо иштеп калдым. Такыр башкача жашоо башталды. Акча жакшы эле табам, бирок карасам дайыны жок. Ошондуктан жашоомду бузуп албайын деп үйлөнүүнү туура көрдүм. Ошол учурда менде ушундай өнөр бар экенин алгачкы жолу байкадым. Телевизордон америкалык адам көмөч казанды ийип «Гиннестин рекорддор китебине» киргенин көрүп, мен дагы кызыгып калгам. Анан 2 сааттын ичинде мындай өнөрдүн ээси болуп чыга келдим. Көмөч казанды кантип бүктөп, жазып койгонумду өзүм да билбей калгам. Бүктөлгөн көмөч казандарды эсептесем 78 болуп жаткан, Украинага барып келгенден кийин 80ден ашты.

– Көмөч казанды бүктөп, кайра калыбына келтиргенден кийин тамак жасоого болобу?
– Болот. Мен ийгенден кийин кайра дагы 2-3 жолу бүктөсөм болот, андан кийин жыртылып калат экен.

– Кантип өнүктүрдүң бул өнөрдү?
– Үйдөн калың китепти колум менен экиге бөлүп, чаканы тишим менен айрып жүрүп,
КамАЗдарды сүйрөөгө өттүм. Анан ичиме катып жүрө бербей тааныштарга, досторго көрсөтүүнү чечтим. Борбордогу Төкөлдөштүн унаа токтотуучу жайына барып, унаага жип улап, аны тиштеп жылдырайын дегем. Барсам бир киши «койчу, кантип ушундай болсун?» дейт. Намыстанып кетип «дагы бирди кошкула» дедим. Дагы бир адам «алыңа ченеп иш кылсаң» деп келекелегенде ого бетер намыстанып, «дагы бир машина кошкула» дедим. Бирди эле сүйрөйүн деген мен үчөөнү чиркештирип салдым. Биринчини 2 жарым метр, экинчини 2 метр, үчүнчүсүн 1 метрдей жылдырып туруп эс-учумду жоготуптурмун. Катуу күч келип, моюнуман кан өтпөй калыптыр. Эсиме келип, кайра сүйрөйүн деп тура калсам, чогулган эл, баягы намысыма тийгендердин баары кол чаап жатышыптыр.

– Орто жолдон бул өнөрүңдү таштайм дептирсиң...
– Ойлонуп көрсөм, бул өнөрүм мага эч нерсе алып келбейт экен. Тияк-биякка барып көрсөтөм, жол киреге, көмөч казан сатып алганга акча кетирем, убактымды коротом, андан башка жагын көрө албадым. Ошон үчүн тынч эле иштеп акча табайын деп жумшак эмерек жасаган цехке кирип кеткем. «Кыргызстан таланттары» деген долбоордун жетекчиси Вячеслав Гудинов менин видеомду «Украина таланттары» сынагына жөнөтүптүр. Ал кишиге ыраазымын, эгер ал болбосо мен таптакыр таштап салмакмын. Ошентип чейрек финалдан өттүм, бүгүн жарым финалга катышуу үчүн кетип жатам.

– Азамат, ак жол. Ийгилик менен келишиңди күтөбүз.

Сүйүн Кулматова
star@super.kg