Жогорудагы окуяда жабырлануучу өзүн зордуктаган адамды өлтүрүп алса, төмөнкү окуяда болсо зордукчу курмандыгын өлтүрүп салган. 19-сентябрь күнү Бишкек шаарынын Ибраимов көчөсүндөгү жаңы курулуп жаткан имараттын жер төлөсүнөн 19 жаштагы кыздын жансыз денеси табылган.

«КЫЛМЫШКА ШЕКТҮҮ ТАЖИКСТАНДАН КАРМАЛДЫ»
Октябрь РИИБинин кызматкерлери бул кылмышка шектүү деп Чүй облусунун Панфилов районунун Болот Иманкулов аттуу 22 жаштагы тургунун аныкташкан. Кылмышка шектелип жаткан бала Тажикстандан кармалды. Коркунучтуу жана кейиштүү бул кылмыш иши туурасында Бишкек шаардык ИИББинин басма сөз кызматкери МЫРЗАБЕК ТОКТОСУНОВ буларга токтолду:
– 19-сентябрь күнү эртең мененки саат 8дер чамасында нөөмөт бөлүмүбүзгө шаарыбыздын Ибраимов көчөсүндөгү жаңы курулуп жаткан үйлөрдүн жер төлөсүнөн киши колдуу болгон 18-19 жаштагы кыздын денеси табылгандыгы туурасында маалымат келген. Иликтөөнүн жүрүшүндө ал Мира деген Жумгал районунун 19 жаштагы тургуну экени аныкталган. Соттук-медициналык экспертиза анын зордукталып, муунтулуп өлтүрүлгөндүгүн тастыктады. Бул кылмышка шектүү катары Болот Иманкулов аттуу Панфилов районунун тургуну изделип, Тажикстандын орган кызматкерлеринин жардамы менен колго түшүрүлүп, Кыргызстанга алынып келинди. Болот Иманкулов кылмышын моюнуна алды. Кылмыш-жаза кодексинин 97-беренесинин негизинде кылмыш иши козголуп, учурда убактылуу кармоочу жайга киргизилген. Тергөө иштери жүрүп жатат.

«КОКУСУНАН МУУНТУП ӨЛТҮРҮП АЛДЫМ»
Кылмышка шектүү 22 жаштагы БОЛОТ ИМАНКУЛОВ төмөнкүчө көрсөтмө берген:
– Мира аттуу кызды өлтүрүп алдым. Мас абалда колум менен муунтуп өлтүрдүм. Досторума жолугуп, коньяк ичкен болчумун. Анан мен, Эрлан деген досум, анын классташ кызы жана Мира төртөөбүз чогуу кечинде шаар айландык. Кийин мен иштеген курулуш жүрүп жаткан имаратка келдик. Эрлан классташ кызы менен биринчи кабатта отурган, мен Мира менен жер төлөдө элем. Аны зордуктоого барганымды билбей калдым. Анын айынан Мира экөөбүз чырдаша кеттик. Кокусунан муунтуп өлтүрүп алдым.

Зордуктоо эң оор кылмыштардын бири. Анын арты өлүм, темир тор артындагы оор жаза аткаруу менен аяктап жатса да мындай кылмыштын аягы суюлбай келүүдө.

Уулбү Каныбекова
koom@super.kg