Жылдан жылга мелдешке катышкан командалардын саны өсүүдө. Быйыл жалпы 16 команда ат салышты. Көпчүлүк командалардын курамын жаш оюнчулар түзүп, ири эсеп менен жыйынтыкталган оюндар болбой койгон жок. Саны көбөйгөнү менен, командалардын көрсөткөн оюнунун сапаты анчейин эмес. Мелдеш олимпиадалык систем менен өтүп, жеңилген команда мелдештен четтей берди. Негизги фаворит катары саналган командалар «Ынтымак», «Достук» жана «Биримдик Аю» командалары жарым финалга эч кебелбей аттанышты. «Чүчү кулактын жыйынтыгында бизге жаңы командалар туш келип, аттарды жана өзүбүздү дагы көп кыйнабай жарым финалга чыктык. Күчтүү командалар менен чечүүчү беттештерде ойнойбуз»,- деп ою менен бөлүштү «Достуктун» улакчысы Манас Ниязов. Жарым финалдын акыркы жолдомосун Чүй облусунун эки командасы «Арашан» менен «Сары-Өзөн» талашты. Эки команда тең бирдей оюн көрсөткөнү менен, оюндун акыркы мүнөттөрүндө "Арашан" командасы жеңүүчү аталды.

Жарым финалда Таластын «Ынтымагы» менен Чүйдүн «Биримдик Аю» командалары көрүүчүлөр үчүн мыкты беттеш тартуулашты. Бирин Карыпбек Эшиев алдыга сүрөсө, экинчисин Рустам Тыналиев чабуулга үндөп жатты. Эсепти "Биримдик Аюнун" улакчысы Урмат Мусаев ачканы менен, жаракат алгандыгынан улам оюнду уланта алган жок. "Ынтымак" командасы чабуулдук ыргагын күчөтүп, эсепти тең кылганга үлгүрдү. Андан соң эсепти 2:1ге айлантты. Калган мүнөттөрдө "Биримдиктин" бирдиктүү чабуулдарынан майнап чыкпай, өлкөнүн мыкты улакчыларынын бири Рустам Тыналиев бул жолу дагы финалсыз калды. «Биздин коргонуубуз бир аз начар болуп калды окшойт. Атаандашыбыздын казанына көп улак түшпөй калды. Оюнду башында жакшы баштаганбыз, айрым балдарыбыз жаракат алып оюндун ыргагы бузулуп кетти»,- дейт Урмат Мусаев. «Абдан күчтүү командага туш келип калдык, жеңишке жетип финалга өтө алдык. Өткөн жылы бул мелдештин жеңүүчүсү аталганбыз»,- дейт оюндан кийин кубанычын жашырбай «Ынтымактын» улакчысы Азим Болот уулу. Ал эми экинчи оюнда "Достук" командасы "Арашан" командасына дымагын көрсөтүп, ири эсепте жеңип алды. Ошентип, «Нооруз-2018» мелдешинин финалында кайрадан «Ынтымак» менен «Достук» беттешмей болду.

Нооруз күнү чечүүчү оюндар орун алып, адаттагыдай ат майданда басканга эмес, турганга да орун табылбай жатты. «Достук» менен «Ынтымактын» тиреши көпчүлүктү кызыктырбай койгон жок. Талашсыз, эки дөө-шаа команда учурда мыкты оюн көргөзүп келишет. Бирок... Финалдык оюн муну тастыктады. Биринен өтүп бири эр, күчү, амалкөйлүгү жагынан да улакчылар бирдей деңгээлде. А бирок бул оюнда бир гана улакчылар эмес, аргымактар да бар. Таластын оюнчулары минген аттар атаандаштардыкынан бир кыйла мыкты болуп, оюнчуларга жардам беришти. Биринчи бөлүктө Манас Ниязов билген ыкмасына салып, улак менен кошо өзү тай казанга кирип, эсепти ачты. Мындан кийин ат майданда бир эле команда көрүнүп жатты. Ал – «Ынтымак». Экинчи бөлүк башталар замат чабуулдан башы чыкпаган Таластын командасы эсепти теңеди. Азим Болот уулу таамай болду. Андан соң Нуржан Мелисбек уулу ийгиликтүү болуп, жеңишти «Ынтымакка» алып келди. Калган мүнөттөрдө чаалыга түшкөн «Достук» чабуулга өтө албай койду. Манастан да майнап чыккан жок. Таластын тың чыкмалары татыктуу 1-орунду алышты. Жашоодо ынтымак менен достук эриш-аркак жүрөт. Бирок көк бөрүдө «Ынтымак» биринчи орунда. Бүгүнчө...

Жеңиштин сырлары жөнүндө оюндан соң «Ынтымактын» оюнчулары айтып беришти. Урмат Раушан уулу, улакчы:
– Оюн абдан кызыктуу өттү. Күйөрмандар үчүн эле эмес, оюнчулар үчүн дагы. Өлкөбүздө эң күчтүү делген 3 команда бар, ошолордун бири менен финалда кез келдик. Утулуп жатканда намыстандык. Кайра чыйралып жеңишти илип кеттик.

Карыпбек Эшиев, улакчы:
– Бул мелдешке бүтүндөй Кыргыз өлкөсүнүн ар бир командасы кышы бою даярданган. Биз дагы эмгектендик. Канчалык күчтүү командаларга туш болсок дагы жеңип чыктык. Капитаныбыздан "финалда ачууга такыр алдырбагыла, оюндун ыргагын сезип, утулуп жатсаңар дагы өзүңөрдүн оюнуңарды уланткыла" деген тапшырма коюлган. Акылга салып тактика менен ойнойлу дедик. Бири-бирибизди колдоп, жакшы сөздөрдү айтып дем бердик. Күйөрмандарыбызга миң мертебе ыраазыбыз. Таластын эли бүт келип колдоп тургандай болду. «Ынтымак» командасы өз күйөрмандарынын алдында майрамды улантты. Анда Канатбек Бегалиевге сөз берилип, ал: "Бул күн тарыхта кала турган күн. Бүгүн кимдин ким экени билинди. Мен айтар элем, спорт менен намысты Талас облусунан эч ким талашпай эле койсун",- деп азил-чыны аралаш айтканы коомчулукта талкуу жаратты. Эртеси айтылуу балбан туура эмес сүйлөп алганын моюнга алып кечирим сурады. Мелдештин жыйынтыгы боюнча мыкты чабуулчу Манас Ниязов («Достук»), мыкты оюнчу Нуржан Мелисбек уулу («Ынтымак») жана мыкты аргымак наамына Күрөң («Арашан» командасыныкы) татыды.

Жарым чейрек финал:
"Достук" – "Эмгек-Талаа" – 13:2
"Көк-Жал" – "Аафият" – 7:1
"Сары-Өзөн" – "Четинди" – 8:1
"Арашан" – "Илбирс" – 12:1

Чейрек финал:
"Ынтымак" – "Толкун" – 8:1
"Биримдик Аю" – "Мурас" – 7:3
"Достук" – "Көк-Жал" – 14:2
"Сары-Өзөн" – "Арашан" – 0:1

Жарым финал:
"Ынтымак" – "Биримдик Аю" – 2:1
"Достук" – "Арашан" – 15:1

3-орун үчүн:
"Биримдик Аю" – "Арашан" – 6:1

Финал:
"Ынтымак" – «Достук» – 2:1