Кыргыз каскадёрлору биринчи жолу дүйнөлүк “Taurus” сыйлыгын жеңип алды. "Nomad Stunts" каскадёрлор тобунун мүчөсү Жамил Жуматаев бул тууралуу буларга токтолду:
– “Taurus” сыйлыгы каскадёрлордун "Оскары" деп эсептелет. Биз бул сыйлыкка казакстандык режиссёр Акан Сатаевдин "Томирис" тасмасында эң мыкты трюктарды аткарганыбыз үчүн татыктуу болдук. Киного жалпысынан 15 кыргыз каскадёру тартылган. Тасма 2018-жылы тартылып, 2019-жылы экранга чыккан. Ал эми “Taurus” 2020-жылдын аягында Лос-Анжелестеги дүйнөлүк каскадёрлор академиясы тарабынан берилди. Сыйлоо аземи пандемияга байланыштуу онлайн форматта өттү.