Интернет айдыңына жылаңачталып, өзүнүн мекендештери тарабынан сабалып, кордоого алынган кыргыз кызы тууралуу видеотасма тарады. Окуя Орусиянын аймагында болгону видеонун жүрүшүндө байкалат. Муну Ички иштер министрлиги да маалымдады. «19 жаштамын, Баткен облусунан болом» деген кызды кыргызча сүйлөгөн бир нече жигит уруп-согуп, оозго алгыс сөздөр менен сөгүп суракка алышкан. «Эмнеге бөлөк улуттун эркектери менен жүрөсүң?!» Негизги суроо ушул. Бир кызды 4-5 эңгезердей жигиттин токмоктогону абийирдин чегинде алганда – алсыздык, мыйзамдын чегинде – кылмыш.
Көпчүлүктүн айтымында, мындай топтор өздөрүн «патриоттор» деп атап алышкан. «Кайсы арына?» деген суроо келип чыгат. Мындай окуя биринчи кайталанып жаткан жок. Бирок ИИМ буга чейинки окуялар боюнча күнөөлүүлөрдү таап, тиешелүү жаза алууга жеткирген жок. Тескерисинче. «Мындай видеону Кыргызстандын аймагында интернетке ким таратып, ким бөлүшүп жатат? Бул видео эки улутту араздаштырууга жол салат...» Кыргызстандын укук коргоо органдарын маселенин ушул жагы гана кызыктырат өңдүү. Анткени ал видеодо жигиттер кызды "өзбек балдар менен жүрөсүң" деп күнөөлөшүүдө. Адамдар динине, терисинин түсүнө, тилине, улутуна карата жиктелбеши, кемсинтилбеши керектиги, ар бир адам каалаган жагына барууга, түгөй, кесип жана башка ушул сыяктууларды тандоодо эркин экендигин бул сыяктуу псевдопатриотторго жеткирүүгө укук коргоо органдары чабалдык кылууда. Андан ары ал кызды зордукташтыбы, өлтүрүштүбү, балким, акыл-эсинен адаштырып майып кылып салыштыбы, белгисиз. Бардык нерсе мыйзам чегинде болуусу керек. Кыргыз коомчулугунда, айрыкча Орусияда жашап-иштеп жүргөн мекендештерибизде ушундайда «патриотторго» чыныгы жигитчилик тарбия сабактарын өтүп коё турган чыныгы патриоттор керек болуп турат.
Бирок, тилекке каршы, бул "патриотторду" коргоп, аларды колдогондор да жок эмес. Интернетте бул окуя боюнча талкуу жаралганда "кыргыз кыздар жеңил ойлуулугунун айынан бөлөк улуттардын алдында кыргыздардын намысын түшүргөнү үчүн ушундай жаза алып жатышат" деген ойду кармангандар да чыкты.

Мирлан Өмүралиев
politika@super.kg