“Тамашоу” Лигасынын “Ак-Өргө city” командасы Ош жергесин кыдырып концерт берүүдө

“Тамашоу” Лигасынын “Ак-Өргө city” командасы Ош жергесин концерттик турне менен кыдырып жүрөт. Бул тууралуу SUPER.KG порталына бүгүн, 13-мартта аталган команданын оюнчусу Самат Эркинбеков билдирди.

Маалым болгондой, кечеде "Ак-Өргө city” командасы сатиралары менен күлкү сүйүүчүлөрүнүн маанайын көтөрүүдө. “Тамашоучу” жигиттердин концерти кызыктуу өтүп жатат. Алсак, көрүүчүлөр оюнчуларга тема сунуштап, аны тилинен чаң чыккан тапандар көркөмдөп өзгөчө номер тартуулап, элдин колдоосуна арзышууда. Ошондой эле оюнчулар сахнага залда отурган күлкү күйөрмандарынан чыгарышып, алар команда менен биргеликте оюн көрсөтүп беришсе, ырчылар Асел Касымова менен Жумагүл Райымжан кызы обон созуп, ыр сунуп жатышат.

“Биз командабыз менен биринчи жолу өнөрүбүздү көрсөтүү максатында турнеге чыктык. Башкы максатыбыз - түндүк-түштүк деп бөлүнгөн маселени жоюу. Бизди күйөрмандарыбыз жогорку деңгээлде кабыл алышты. Кечебизге эл толуп, аншлаг менен өтүп жатканына кубанып турабыз. Алдыда Нарын, Талас, Баткен, Ысык-Көл, Жалал-Абадды кыдырып чыгармачылыгыбызды тартуулайбыз”,- деди С.Эркинбеков.