"Тамашоунун" 7-сезонунун жарым финалында оюнчулар Омарды үйлөнтүштү

Бүгүн, 22-мартта Бишкектеги Спорт Ордосунда “Тамашоу” Лигасынын 7-сезонунун жарым финалы орун алды.

Бул мелдеште “ОШолор”, “Бишкек”, “Тамашарики”, “Олимпик”, “НКБ”, “National”, “Универсал”, “Позитифф”, “Евраш”, “Brooklyn”, “Кыргыз двор”, “Элестет”, “Ассорти”, “IUK”, “Айым стайл” командалары ат салышты. Мыкты даярдыкта келишкен оюнчулар көрүүчүлөрдү күлкү дүйнөсүнө бөлөп, 4,5 саат тамашага сугарышты.

Финалга озуп чыгууну самаган командалар мыкты даярдыкта келишиптир. Алсак, татына кыздардан түзүлгөн “Айым стайл” командасы калыстар тобунун мүчөсү, ырчы Омарды сахнага чагарышып, оюнга аралаштырышты. Ырчы мырза милиция айымга сурак берип жаткан адамдын ролун аткарды. Кызматтык абалынан кыянаттык менен пайдаланган айымдын “эч нерсе айтпайсың да, ээ...” деп бир нече жолу Омардын бетинен өөп алганы ырчы үчүн күтүлбөгөн учур болду. Бир маалда үлпөт көйнөгүн кийип чыга келген кызды Омарга турмушка беришти. Залдагылардын “горько” деп кыйкырганына Омар андай нерсе никеден кийин гана болорун айтып ыңгайсыз абалдан чыгып кетти.

Окуучулардан куралган “Тамашарики” командасынын оюну апалары жана бөбөктөрүнүн катышуусунда болду. Алар чоңдордун алдаганын, ата-эне менен балдардын мамилесин тамашага салышты.

“Универсал” менен “Позитифф” командаларынын оюну актёрлук чеберчилиги менен өзгөчөлөндү. Алардын жараткан образдары колдоого алынып жатты. 

Айта кетсек, бул оюнда саясат, мамлекеттердин ортосундагы алака, кыз-жигиттин мамилеси, үй-бүлө темасы тамаша аркылуу чагылдырылды.

Мелдешти сынынан өткөрүп жатышкан инсандар “Ким тапан?” тапшырмасында берилген суроолорго өзүлөрү да жооп берип жатышты. Мисалы, футболчу Азамат Байматовдун “Ты чё такой дерзкий?” дегенине Омар “А ты чё такой сельский?” деген жооп узатты. Мындай жооптон кийин залды каткырык курчады.

Ал эми таймашты алып барган Эрмек Нурбаев да куйкум сөздөрү менен оюнду кооздоп турду. Мелдеш кызыктуу тамашаларга мол болуп, позитивдүү, жагымдуу маанай тартуулады.

Жаш өнөрпоздордун тапкычтыгы жана тапандыгы “Супер-Инфо” гезитинин башкы редактору Дамира Арстанова, Кыргыз Эл артисти Гүлнур Сатылганова, дизайнер Замира Молдошева, ырчылар Омар, Урмат Усенов, футболчу Азамат Байматов, юрист Жоомарт Жолдошев, “No name” командасынын капитаны Мурат Жалиевдин элегинен өттү.

Жыйынтыгында “Универсал”, “Тамашарики”, “Ассорти”, “Позитифф”, “Кыргыз двор”, “Айым стайл” командалары финалга жолдомо алышты.