Ош. Эстакадалык көпүрөнүн байланыштырып турчу жолдорунун курулуш пландары иштелип чыгууда

Ош шаарындагы эстакадалык көпүрөнүн байланыштырып турчу жолдорунун курулуш пландары иштелип чыгууда. Бул тууралуу бүгүн, 2-июнда шаар мэри Айтмамат Кадырбаевдин Навои көчөсүндөгү көпүрөнүн курулуш иштери менен таанышуусунда белгилүү болду. 

Маалым болгондой, учурда объектинин 2-баскычынын курулуш иштери аяктоодо. Ош шаарынын жол башкармалыгынын башчысы Арзыбек Жунусовдун айтымында, бүгүнкү күндө тургузулган түркүктөргө темир-бетон устундарын коюу жумуштары жүргүзүлүп жатат.

“А.Навои көчөсүндөгү эстакадалык көпүрөнүн курулуш иштери 3 баскычка бөлүнгөн. 2-баскычынын жумуштары толугу менен 1-июлга барып аякташы кажет. Андан кийин ал мамлекеттик экспертизанын текшерүүсүнөн өтүп, 3-баскычты ишке ашыруу боюнча тендер жарыяланат.

Учурда курулуш иштерине 75 жумушчу тартылган, алардын ону жогорку квалификациялуу адистер. Мындан тышкары ондон ашык ар кандай техника иштөөдө”,- дейт Жунусов.  

Айта кетсек, курулуш иштери толугу менен 2015-жылдын 3-кварталына барып аякташы пландалган.