"Тилек Шаабаевди атып өлтүрүшкөн МАИ кызматкерлери тосмо арыз жазуу үчүн 4 миң доллар сунуштап жатышат" дейт маркумдун досу

23 жаштагы Тилек Шаабаевди атып өлтүрүшкөн МАИ кызматкерлери тосмо арыз жазуу үчүн 4 миң доллар сунуштап жатышат. Бул тууралуу бүгүн, 13-июнда SUPER.KG порталына маркумдун жакын досу Турат Кадыров билдирди.

“Бүгүн Тилек Шаабаевди жерге берип келдик. Анын өлүмү боюнча Москва райондук прокуратурасына арыз жазганбыз. МАИ кызматкерлери тосмо арыз жазуу үчүн 4 миң доллар сунушташты, бирок бизге акчанын кереги жок, болгону татыктуу жазаларын алышсын”,- дейт Кадыров.

Ошондой эле ал: “Досумдун канчалык күнөөсү бар же жогун билбейм. Ички иштер министрлиги кызматкер жыгылганда куралынан ок чыккан деп жатат, бирок ок Тилектин денесине өйдө жактан келип тийген. Бул боюнча экспертизанын жыйынтыгы эки-үч күндө даяр болот”,- деди.

Ички иштер министрлигинин маалыматына караганда, 11-июнь күнү саат 21:30 чамасында Бишкек-Ош унаа жолунун 39-чакырымында Ниссан Альмера унаасын токтотуу үчүн белги берилген, бирок айдоочу жол-кайгуул кызматкерлерине баш ийбей, унааны катуу ылдамдыкта айдап жөнөгөн. Анын артынан түшкөн кызматкерлер унаанын алдына чыгып, бири эскертүү иретинде асманга ок чыгарган. Ага да болбогон айдоочу жол-кайгуул кызматкерин сүзүп, качып кетүүгө аракет кылган. Ошол учурда жыгылган кызматкердин куралынан ок чыгып, айдоочуга тийген. Мындан улам ал ооруканага жеткирилип, тилекке каршы, аны сактап калууга мүмкүн болгон эмес.