Грузияда ири дарыя ташкындап, бир канча адамдын өмүрүн алды жана зоопарк талкаланып, андагы жапайы жырткычтар качып кетишти

13-июнь күнү Грузиянын борбор калаасы Тбилисиде катуу жааган жамгырдан Вере аттуу ири дарыя ташкындап, андан 12 адам каза болду. Чет өлкөлүк маалымат каражаттары суу ташкындын кесепетине кабылган дагы 10го чукул адамдын дайынсыз болуп жатканын жазышууда. Ошол эле учурда шаар бийлиги суу бир канча үйдү каптап, электр зымдары жараксыз абалга келип, коомдук транспорттук каттам токтотулганын билдирди. Андан сырткары 30дан ашуун үй-бүлө баш паанексиз калганы айтылды.
Ал эми калаада жайгашкан зоопарк да талкаланган. Андагы бир канча аюу, карышкыр, арстан, жолборс жана башка жапайы жаныбарлар шаар аралап качып кетишкен. Анын айрымдарын кайтарып келишсе, айрымдарын көргөн жерден атып өлтүрүүгө мажбур болушууда.