Үч эмдин апасы: "Өкмөт тараптан 100 миң сом жардам көрсөтүлгөн, ал акча азыр сакталып турат"

"Өкмөт тараптан 100 миң сом жардам көрсөтүлгөн, ал акча азыр сакталып турат". Муну бүгүн, 15-июнда SUPER.KG порталына үч эмди жарыкка алып келген 23 жаштагы Бактыгүл Камчыбек кызы билдирди. Анын айтымында, өкмөт балдар үчүн деп бөлүп берген каражат учурда банктык эсепте сакталып турат.

“Кудайга шүгүр, балдарым менен аман-эсен, ден соолуктарыбыз жакшы. Мындан беш күн мурда өкмөт тараптан акча бөлүндү деп жакшы кабар айтып, эки кызматкер келген. Ошол акчанын эсебинен өзүмө керектүү делген дары-дармек жана башкаларын акырындан сатып алып жатам. Негизи, буга чейин жардам бергендер көп эле болду, баш-аягы 30 миң сомдой келди. Учурда кайрымдуулук кылгандар токтоп калды.

Бишкектин Жал кичи районунда жайгашкан Баланы жана энени коргоо борборундабыз. Демөөрчүлөр ижарага алып беребиз деген үйгө чыга элекпиз. Өкмөт бир бөлмөлүү болсо да үй берип калар деген үмүттөмүн”,- дейт Бактыгүл айым. 

Кошумчалай кетсек, үч эм 5-июнда жарыкка келген.