2010-жылы Июнь окуясында жаралган конфликттик өзгөчө кырдаалдан көбүнесе аялдар менен кыздар жабыркаган

2010-жылы Июнь окуясында жаралган конфликттик өзгөчө кырдаалдан көбүнесе аялдар менен кыздар жабыркаган. Бул тууралуу бүгүн, 14-июлда “Калктын алсыз топтору өзгөчө кырдаалда” аттуу тегерек столдун жүрүшүндө КРнын Өзгөчө кырдаалдар министрлигинин Бишкек шаары боюнча башкармалыгынын башчысы Болотбек Аманбаев билдирди. Анын айтымында, учурда өзгөчө кырдаалдарда гендердик зордук-зомбулукту жоюуга арналган документ иштелип чыгууда.

“Бүгүн биз ошол жаңы документти талкууга алып жатабыз. Анын негизги максаты - министрликтер менен ведомстволор ортосунда аткарыла турган жумушту тактап, бир нукка коюп иштөө. Анда өзгөчө кылдаалда зомбулукка учураган аялга же кызга кандай мамиле жасоо кажет, аны кайсы мекеменин карамагына жөнөтүү зарыл жана башка ушуга окшогон иш-аракеттер жазылат. 

2010-жылы болгон Июнь окуясы биздин жумуштагы кемчиликтерди ачык көрсөтүп койду. Ошол конфликтте канча адам зомбулукка учурагандыгы катталган эмес, демек, белгисиз. Көптөгөн адамдар күч органдарына да кайрылган эмес”,- деди Аманбаев.