“Европанын мыкты футболчусу” наамына "Ювентустун" 5 оюнчусу, "Барселонанын" 3 оюнчусу көрсөтүлдү

УЕФА акыркы сезондун жыйынтыгына карап “Европанын мыкты футболчусу” наамынын ээсин аныктайт. Бул сыйлыкка талапкер 10 футболчунун ысымы белгилүү болгонун аталган уюмдун расмий сайты кабарлады. Маалым болгондой, добуш берүүнүн негизинде тизмедеги 10 футболчунун ичинен сыйлыкка негизги 3 талапкер иргелет. Ал эми сыйлык ээси 28-августта белгилүү болот. 

Тизмедеги футболчулар төмөнкүлөр: Эден Азар ("Челси"), Жанлуиджи Буффон ("Ювентус"), Артуро Видаль ("Ювентус"), Лионель Месси ("Барселона"), Неймар ("Барселона"), Андреа Пирло ("Ювентус"), Поль Погба ("Ювентус"), Криштиану Роналду ("Реал"), Луис Суарес ("Барселона"), Карлос Тевес ("Ювентус"). 

Кошумчалай кетсек, бул сыйлык Европанын ири лигаларында ойногон футболчуларга тапшырылат. Өткөн жылы бул сыйлыкты португалиялык футболчу, "Реалдын" чабуулчусу Криштиану Роналду утуп алган.