"Ислам мамлекети" террордук тобунун атынан кыргыз элине кайрылуу жасаган адамдын аты-жөнү такталууда

"Ислам мамлекети" террордук тобунун атынан кыргыз элине кайрылуу жасаган адамдын аты-жөнү такталууда. Ал эми видеокайрылуу боюнча иликтөө иштери башталды. Бул тууралуу бүгүн, 27-июлда Ички иштер министрлигинен SUPER.KG порталына билдиришти.

Маалыматка караганда, кайрылуу интернетке (YouTube) 25-июлда кечинде чыгып, жарыялангандан 6 саат өткөндөн кийин YouTube видеохостингинин администрациясы аны өчүргөн. 9 мүнөткө созулган тасмада кыргыз тилинде сүйлөгөн белгисиз жарандын кайрылуусу орун алган. Анда "Ислам мамлекети" тобуна кошулууга чакырык ташталган. Кайрылууда Кыргыз Республикасы "каапырлар өлкөсү" деп аталып, жарандар адамдар тарабынан ойлоп табылган мыйзам-эрежелер менен жашап жатканы белгиленген.  

Эскерте кетсек, мындан 10 күн мурун Бишкекте жардыруу уюштурууну көздөгөн топ жок кылынган. УКМК өлтүрүлгөн жана кармалган жарандар "Ислам мамлекети" тобунун мүчөлөрү экенин жарыялаган эле. Бишкектеги аталган топту каржылап, көмөктөшкөн деп күнөөлөнүп Жогорку Кеңештин мурунку депутаты Максат Кунакунов аэропорттон кармалып, камакка алынды.