Башкы прокуратура БШКга Карганбек Самаковду, Игорь Чудиновду жана Искендер Айдаралиевди кылмыш жоопкерчилигине тартууга макулдук берүүнү сунуштады

Бүгүн, 10-сентябрда Башкы прокуратура Борбордук шайлоо комиссиясына кайрылып, парламенттик шайлоого катышып жаткан талапкерлер: Жогорку Кеңештин депутаты Карганбек Самаковду, экс-премьер-министр Игорь Чудиновду жана экс-вице-премьер-министр Искендер Айдаралиевди кылмыш жоопкерчилигине тартууга макулдук берүүнү сунуштады. Бул тууралуу Башкы прокуратуранын маалымат кызматынан билдиришти.

Маалыматта Самаковдун Чүйдүн Кара-Жыгач, Байтик жана Лебединовка айыл аймактарындагы 262 гектар жер тилкесин 2007-2008-жылдары мыйзамсыз трансформациялоо иши боюнча тергөө улантылып жатканы жана ага тиешеси бар делген жарандар жоопко тартылып жатканы айтылат. 

Ал эми Башкы прокуратура тергөөдө өкмөттүн аталган жер тилкесин трансформациялоо боюнча токтому мыйзамсыз чыгарылганын ырастап, өкмөткө токтомду жокко чыгаруу сунушун киргизген. Өкмөт 3-сентябрда келтирилген сунушту канааттандырганы айтылды. Мындан улам прокуратура жогоруда аты аталган адамдарды кылмыш жообуна тартууну сунуштап жатат. 

Эскерте кетсек, Самаков 262 гектар жер тилкесин 2007-2008-жылдары мыйзамсыз трансформациялоо кылмышына айыпталып, ушул жылдын 14-майында ага карата кылмыш иши козголуп, камакка алынган. 2015-жылдын 17-майында Бишкек шаарынын Октябрь райондук соту Самаковго карата бөгөт коюу чарасын карап, 2 айга үй камагына алуу чечимин кабыл алган.