Ысык-Көлдө милиционерлер үйгө мыйзамсыз кирип, эки жаранды ур-токмокко алуу боюнча айыпталышууда

Ысык-Көл облусунда 7 милиция кызматкери эки жаранды ур-токмокко алуу боюнча айыпталууда. Бул тууралуу бүгүн, 11-сентябрда Башкы прокуратуранын басма сөз кызматы билдирди.

Маалыматка ылайык, жарандык кийимчен милиция кызматкерлери үйгө мыйзамсыз кирип, үйдүн ээсин жана анын жакын адамын ур-токмокко алышып, Ысык-Көл РИИБине жеткирип, токмоктогонду улантышкан. Милиционерлер алардан кылмышты жасагандыгы тууралуу көрсөтмө берүүнү талап кылышкан. Мындан улам жабырлануучулардын ден соолугуна жеңил залал келтирилгени соттук-медициналык экспертизада аныкталган.

"Ысык-Көл районунун прокуратурасы бул факт боюнча "кызматтык ыйгарым укуктарын жогорулатуу" жана "кыйноо" беренелеринин негизинде кылмыш ишин козгоду. Учурда тергөө амалдары жүрүп жатат",- деп билдирет Башкы прокуратура.