“Ислам мамлекетинин” видеосунан улам таасирленген даниялык 15 жашар кыз өз энесин бычактап салды

"Ислам мамлекети" террордук тобунун интернет баракчаларында таратылган видеолорунан улам таасирленген 15 жашар даниялык кыз өз энесин бычак менен сайып өлтүрдү. Үрөй учурган мындай маалыматты бүгүн, 16-сентябрда чет элдик маалымат булактары кабарлашты.

Маалым болгондой, энесин өлтүрүүгө бел байлаган кызга 29 жаштагы Ирактан келген жигити көмөктөшүп, күнөөсүз энеге 20 ирет бычак сайышкан. "Иликтөө иштеринин жүрүшүндө 15 жашар кыз бир канча саат “Ислам мамлекети” тараткан видеолорду көргөнү аныкталган. Өз энесин өлтүргөн соң кыз полицияны чакырып, окуя боюнча айтып берген. Полиция келген маалда ал чөнтөк телефонунан оюн ойноп, видео көрүп жаткан.

Сот өспүрүм кызды 9 жылга эркинен ажыратуу буйругун чыгарды. Ал эми бул окуяга катышкан кыздын жигити Мухаммед Абдулла 13 жылга кесилди",- деп жазышты басылмалар.