Мамлекеттик тил комиссиясы: “Кыргыз тили коомдо өз ордун таба элек”

“Кыргыз тили коомдо өзүнүн ордун толук кандуу таппай жатат”. Мындай пикирди бүгүн, 21-сентябрда Мамлекет тил күнүнө арналган салтанаттуу аземде КРнын Президентине караштуу Мамлекеттик тил боюнча комиссиясынын төрагасынын орун басары Медербек Аким уулу билдирди. Ал өз сөзүндө: “Буга чейин кыргыз тилин өнүктүрүү боюнча бир катар программалар кабыл алынса дагы, алардын баары 100 пайыз аткарылган эмес. Каржы булактарынын жетишсиздигинен аксап келген. Өлкөнүн жетекчилиги, жарандарыбыздын колдоосу менен мамлекеттик тил акыркы 2-3 жылдан бери кайрадан жандана баштады. Анын негизги кыймылдаткычы катары билим берүү системин, башкача айтканда, кыргыз тили сабагынан берген мугалимдерди эсептейбиз”,- деди.