Феруза Жамашева: "Кылмыш иштери боюнча тергөөнүн сапаты начар болууда"

Бүгүн, 22-сентябрда Жогорку Соттун төрайымы Феруза Жамашева 2012-2015-жылдар аралыгында аткарылган иштер тууралуу маалымат берип жатып: "Жогорку Сотто кылмыш иштерин автоматтык түрдө коллегияларга бөлүү боюнча программа киргизилип жатат. Ошондой эле архивдин электрондук вариантын түзүүнү ойлонуп жатабыз. Үч жыл аралыгындагы дагы бир жетишкендик сотторду окуудан өткөрүү болду. Жаңы дайындалган соттор сөзсүз түрдө эки жумалык окуудан өтүшөт. Мындан ары биз Сотторду окутуу борборунун макамын көтөрүүнү пландап жатабыз.

Кыргыз Республикасындагы аялдар сотторунун ассоциациясын түздүк. Биринчи отуруму 25-26-сентябрда болот. Ал жакта кичинекей балдарга карата зомбулуктун алдын алуу каралат.

Былтыр өлкөдөгү сот тутумунун 90 жылдыгын өткөрдүк. Бул маанилүү маараке болду. Сентябрдын башында Шанхай Кызматташтык Уюмуна мүчө мамлекеттердин Жогорку Сотторунун төрагаларынын 10-кеңешмеси өттү",- деди.

Төрайымдын айтымында, өлкө аймагындагы кылмыш иштери боюнча тергөөнүн сапаты начар болууда. Ошондой эле бул жаатта прокуратура менен ички иштер органдары өз ара иштерди алып барышы керектигин айтып өттү.