Өмүрбек Текебаев: “Ата Мекен” өлкөнү логистикалык туңгуюктан алып чыгат"

“Кыргыз Республикасынын Борбордук Азиянын жаңы логистикалык борбору болуу үчүн бардык мүмкүнчүлүктөрү бар. Өлкөбүз стратегиялык жолдордун жана коммуникациялык агымдардын кесилишинде турат жана бул жагдайды сөзсүз өз кызыкчылыктарыбыз үчүн колдоно билишибиз зарыл”,- деп Жапалак айылынын шайлоочулары менен жолугушуу учурунда Өмүрбек Текебаев билдирди.

Партиянын басма сөз кызматынын маалыматына ылайык, жолугушууда Текебаев соңку 20 жыл ичинде транспорт системинин өнүгүүсү кыйла солгундаганын айтты. "Унаа жолдору курулбай, темир жол куруу боюнча долбоорлор токтоп, жаңы жогорку кубаттуулуктагы электр өткөрүү линиялары ишке киргизилбей, дымып калды. “Ата Мекен” өлкөнү тез арада логистикалык туңгуюктан алып чыгуу үчүн биргелешип аракет кылуу боюнча иш алып барат",- деди Ө.Текебаев.

Ошондой эле жолугушууда мамлекеттүүлүктүн негизин кемирип жеген коррупция коомдун өзөктүү баалуулуктарын да жокко чыгарып жаткандыгын айткан Өмүрбек Текебаев коррупция менен укук коргоо органдарынын жардамы менен гана күрөшүү анын себептери эмес, кесепеттери менен күрөшүү экендигин белгилеп, коррупцияга каршы ишмердүүлүктө мыйзамдык, экономикалык ыкмаларды кененирээк колдонуунун зарылдыгына токтолду.

Мындан сырткары ал “Ата Мекен” түздөн-түз таасир эте турган жаңы антикоррупциялык мыйзамды иштеп чыгып, анын ишке ашырылуусун саясий колдоого алууну камсыздоого ниеттенерин кошумчалады.