Ошто жүздөн ашык эшек жашыруун багылып жатканын кабарлаган окурман "ЭЛДИК КАБАРдын" жеңүүчүсү болду

Ош шаарынын тургуну Нурсултан Токтосунов мындай шектүү көрүнүштү байкап, биринчилерден болуп кабарлоонун артынан SUPER.KG порталынан заманбап смартфон утуп алды. Кыргыздар байыртан эшек этин тамак-ашка колдонушкан эмес, этикалык жактан караганда эшек союуну туура эмес деп эсептешкен. Ушуну белгилеп, укук коргоо органдарына коңгуроо каккан Нурсултанды SUPER.KG`нин редакциялык кеңеши сентябрь айынын жеңүүчүсү деп тапты. 

Маалымат тарагандан кийин Ош шаардык милициясы аталган жайды текшерип, 100дөн ашык эшек табылганын жарыялады. Эшектердин кожоюну кытай жараны аларды Кытайга экспорттоо үчүн бир апта мурун жергиликтүү жашоочулардан орточо 2000 сомдон сатып алганын айткан. Эшек экспорттоого тийиштүү документтери бар экенин, бирок документтери шеригинде экенин айтып милицияга көрсөтө алган эмес. Териштирүү иштери жүрүп жатканы айтылууда.
Окурмандын кабары тамак-аш коопсуздугу боюнча укук коргоо органдарына кагылган коңгуроо болду. 

Жеңүүчү борбордон алыста болгондуктан, телефон аркылуу баарлаштык.

- Рахмат, кубанычтамын!

- Өзүм шаардын ХБК кичи районунда турам. Көчөдөн өтүп баратып эшектердин айкырганын угуп жүрчүмүн, бирок эмне болгон эшектер экенин билчү эмесмин. Бишкектеги эшек окуясы катуу таасир эткендиктен, акыры кирип көрүүнү туура көрдүм. Тосулуу аймак болгондуктан, короодон ашып кирип эшектер кармалган жайды сүрөткө тартууга жетиштим. 

- Өзүм болочок юрист болгондуктан, эшектер мыйзамсыз багылып, элдин тамак-ашына пайдаланылып жаткан болсо, коомчулукка алып чыгайын дедим. Союлган эшектер жок болсо да, менде шектенүү жаралды. Бир четинен мага тажрыйба болду. Анын үстүнө мусулманчылыкта эшектин этин жегенге тыюу салынат эмеспи. Жок дегенде Ош шаарындагы кафелерди арам тамактын каптап кетишинин алдын алайын деген ой болду. Менин аракетим укук коргоо органдарына да жардам болсун дедим.

- Укук коргоо органдары адилет баа бериши керек деп эсептейм. Кытайга экспорттойбуз дегенине ишенбейм, бул жөн гана шылтоо. Муну айрымдар кадимкидей бизнес кылып алышты. Кафелер менен сүйлөшүп алышып акча табышууда деп ойлойм. 

- Сиздерге да рахмат!

Белек ээси алыста болгондуктан, заманбап смартфонду анын Бишкектеги агасы Уланбек Акпышаров кеңсебизге келип алып кетти. 

Эсиңизде болсо, быйылкы жазда SUPER.KG порталынын "Соңку кабар" бөлүмүндө "ЭЛДИК КАБАРга" WhatsApp же Viber аркылуу кабар жөнөтүп, ай сайын заманбап смартфон утуп алыңыз!" аттуу сынак старт алган. Мыкты кабар жөнөткөн окурманды редакция ай сайын аныктап, жеңүүчүгө заманбап смартфон белек кылууну убадалаган. Мезгилдин өтүшү менен окурмандар портал менен байланышын бекемдешип, "ЭЛДИК КАБАРга" WhatsApp жана Viber аркылуу +996 557 47-39-39 номерине көптөгөн кабар жөнөтүүнү улантышууда. Турмуштук көйгөйлөр: таза суунун жоктугунан айрым айылдын тургундарынын арыктан суу ичип жатышы, катуу ылдамдыкта унаа айдагандардын айынан кырсыктардын болушу, мыйзамсыздык, мамлекеттик ишкананын чатырында айрылган мамлекеттик желектин турушу, айтор, кызыгуу жараткан кабары менен активдүү бөлүшүү үстүндө.

Эскерте кетсек, апрель айында Сузак районунан Чынберди Жанышов аттуу 10-класстын окуучусу жеңүүчү болсо, май айында Оштогу үй кожойкеси Сабира Казамбекова жеңүүчү деп табылган. Июнь айында Орусияда иштеген Алина Мустапакул кызы, июлда Байысбек Жеңишбек уулу, августта Толгонай Таалайбек кызы жеңүүчү болгон.