Аламүдүндө өрт өчүрүүчүлөр "мас абалында кесиптешин бычактап салышкан" деп шектелишүүдө

Аламүдүн районунда өрт өчүрүүчүлөр "мас абалында кесиптешин бычактап салышкан" деп шектелишүүдө. Бул тууралуу бүгүн, 6-октябрда Чүй ОИИББинин басма сөз кызматы билдирди.
Маалыматка ылайык, 3-октябрда саат 14:00 чамасында Аламүдүн райондук милиция бөлүмүнө Орто-Сай айылында жансыз дене табылганы тууралуу маалымат түшкөн. "Ыкчам тергөө тобу маркум азиат улутундагы 30-35 жаштардагы жаран экенин аныктаган. Жансыз денеден бир нече ирет сайылган бычактын издери табылган. Тиешелүү экспертизанын жыйынтыгында маркумдун өздүгү аныкталган: ал Ысык-Көл облусунда 1978-жылы туулган О.Н. аттуу жаран экени белгилүү болгон. Бул факт боюнча "адам өлтүрүү" беренесинин негизинде кылмыш иши козголгон",- деп билдирет мекеме.
"Кечээ, 5-октябрда тергөө амалдарынын жүрүшүндө бул кылмышка шектүү катары эки жаран кармалды: 1985-жылы туулган Нарын облусунун С.К. аттуу тургуну жана 1978-жылы туулган Ысык-Көл облусунун О.С. аттуу тургуну. Алар убактылуу кармоочу жайга отургузулушту. 
Алдын ала маалыматтарга ылайык, адам өлтүрүү мас абалындагы уруштан чыккан. Учурда тергөө уланууда. Кылмышка шектүүлөр жана маркум Өрт өчүрүү кызматынын райондордун бириндеги бөлүмүнүн кызматкерлери экени аныкталды",- деп жазылат маалыматта.