Чүйдө 11 мектеп окуучусу газ менен ууланды

Чүй облусунун Панфилов районундагы орто мектептин 11 окуучусу газга ууланды. Бул тууралуу бүгүн, 23-октябрда ИИМдин басма сөз кызматы билдирди.

Маалыматка ылайык, 21-октябрда 9-класстын окуучусу кичинекей газ баллонун мектепке көтөрүп келген. "Сабак учурунда анын классташы кызыгып газ баллонун иштетип алган. Жыйынтыгында класстагы окуучулар эс-учун жоготушуп, ооруканага жеткирилишкен. Мектепке газ баллонун көтөрүп келген кыз иттерден коргонуу үчүн алганын жана үйдө кичинекей балдар болгондуктан аны калтырбаганын айтты",- деп жазылат маалыматта.

ИИМден кабарлашкандай, учурда иликтөө иштери жүргүзүлүүдө. Окуучулардан, алардын ата-энелеринен жана мугалимдерден түшүнүк каттар алынды. Мындай окуялардын алдын алуу иштерин Өспүрүмдөрдүн иштери боюнча инспекциясы өткөрүүдө.