Токмоктон каза болгон эки жашар Алиянын атасы: "Бажам кызымды сабап өлтүрүптүр, мага "таштын үстүнөн кулап каза болду" дешкен эле"

Ош облусунун Өзгөн районунда 27-октябрда эки жашар наристе заара кылып койгону үчүн 39 жаштагы Мураш аттуу жарандын токмогунан каза болгон эле. Бүгүн, 30-октябрда SUPER.KG'ге кыздын атасымын деген Медер Абдылда уулу байланышка чыгып, кызы катуу токмоктолуп каза болгонун айтты. Анын билдиришинче, келинчегинин ата-энеси ага кызы чоң таштын үстүнөн кулап түшүп каза болгонун айтышкан.

"Кызым ооруканада жатып көз жумганын 27-октябрь күнү түштөн кийин коңшумдан уктум. Ошол замат ооруканага барып, кызымдын бетинде көк ала тактар бар экенин көрдүм. Келинчегиме жолуга албай, ата-энесинен сурасам, "кызың чоң таштын үстүнөн кулап түштү" деп айтышты. Бажам сабап өлтүргөнүн айтышкан эмес. Чынында, кызымдын бетинин оң тарабында жана чекесинде көк ала так бар эле. Экспертизадан өткөрүп, наристени кыйнабай эле коюуну чечип, сөөгүн жерге берип койгонбуз. Кызымдын токмоктолуп каза болгонун кечинде силердин порталдан окуп калдым. Ошондуктан окуяны кайрадан териштирүүгө кириштим. Заара кылып койгону үчүн өлтүрүп салышканына ачууланып жатам. Кызым 2 жашка да толо элек болчу",- деди Абдылда уулу.

Кызы бажасынын үйүнө кандайча барып калганын да айтып берди. "Келинчегим Айчүрөк экөөбүз жакшынакай жашап жүрүп таарыныша кеткенбиз. Быйыл май айында улуу бажам менен кызымды сабаган Мураштын келинчеги үйдөн аялымды алып кетип калышкан. Ошол бойдон Мураштын үйүндө жашап жүрүшкөн. Бир канча жолу "кайра кел" деп айткам, бирок келбей койгон. Кызымды минтип өлтүрүп коюшарын билгенимде эчак эле алып келмек элем.

Эми өлтүрүп коюшканы аз келгенсип, кызымдын туулгандыгы тууралуу күбөлүгүн бербей жатышат. Келинчегим да мени менен байланышпай качып жүрөт",- дейт кыздын атасы.

Эскерте кетсек, окуя 26-октябрь күнү саат 20:00 чамасында болгон. Анда 39 жаштагы Өзгөн районунун тургуну балдызынын кызын заара кылып койгону үчүн аны тарбиялоо максатында сабаган. Андан кийин кыз Өзгөн райондук ооруканасынын жандандыруу бөлүмүнө жеткирилип, өзүнө келе албай 27-октябрда көз жумган. Дарыгерлер кыз башынан катуу жаракат алганын айтышкан эле.

Бул факт боюнча кылмыш иши козголуп, шектүү адам камакка алынган. Учурда тергөө жүрүп жатат.