"Инсан" тобунун концертинде жаңырган бир кездеги хиттер музыка сүйүүчүлөрүн 90-жылдарга алып барып келгендей болду (фоторепортаж)

Бүгүн, 4-ноябрда Бишкекте легендарлуу "Инсан" тобунун 25 жылдыгына арналган концерт болуп өттү. 3 саатка чукул убакытка созулган концертте топтун жигиттери эски жана жаңы ырларын аткарып өтүштү. Анан да Актан Исабаев, Гүлнур Сатылганова, Эркин Мукашев, Ырыскелди Осмонкулов сыяктуу кыргыз музыкасынын алптары обон созушту. Аталган ырчылар "Инсан" тобунун кайрадан чогулуп, биргеликте чоң сахнага кайтканына кубанып жатышканын билдиришти. Алардын аткаруусундагы бир кездеги хиттер элди 90-жылдарга алып барып келгендей болду.

Ошондой эле конок катары Жийдеш Идирисова, топтун жетекчиси Эркин Мээркановдун шакирттери өнөр тартуулашты. Мээркановдун уулу скрипка чертип, ата өнөрүн жерде калтырбай турганын далилдеп берди. Эл аны жакшы кабыл алып, бир топко кол чаап турду.

"Инсан" тобу ортодо сахнада көрүнбөй калганы болбосо, ар дайым элдин эсинде экенин концерттеги шаңдуу көрүнүштөн улам байкаса болот. Чогулган эл ар бир ырды кошо ырдап, кол чаап, концерттин аягына чейин аларды коштоп турду.
Профессионал музыканттардан турган топ кыргыз эстрадасында сапаттуу чыгармалары менен из салган. Алардын бул күндөгү концерти күйөрмандарынын үмүтүн толук актады дегенге негиз бар.