Жогорку Соттун төрайымы Ысык-Көл облусунун сотторунда болду

12-ноябрда Жогорку Соттун төрайымы Айнаш Токбаева Нарын облусундагы иш сапарын аяктап, Ысык-Көл облусун барып, Тоң, Жети-Өгүз, Ак-Суу, Ысык-Көл, Түп райондук сотторунда, Каракол жана Балыкчы шаардык сотторунда, Ысык-Көл облусунун экономикалык иштер боюнча райондор аралык сотунда, Ысык-Көл облустук сотунда болду.

Мекеменин басма сөз кызматынан 13-ноябрда билдиришкендей, төрайым соттордо Мамлекеттик максаттуу программанын иш жүзүндө жүргүзүлүшүн, сотко кайрылган жарандардын укуктарынын сакталгандыгын көзөмөлгө алды. Ысык-Көл облусундагы райондук соттордун оңдоп-түзөө, интернет жана башка көйгөйлөрүн өз көзү менен көрдү. Иш сапардын жүрүшүндө төрайым сот аткаруучулар менен да жолугушуп, соттун чечимдери өз убагында аткарылышы боюнча түшүндүрүү иштерин жүргүздү.

Токбаеванын Ысык-Көл облусунун жергиликтүү сотторуна болгон кайрылуусунда калктын сотторго болгон ишенимин арттыруу үчүн адилет чечимдерди чыгарып, коррупцияга малынбастан, таза иштеп, кызматтарын так аткаруусу керектиги айтылды.