Кыргыз футболчулары Иордания менен болчу беттешке кам көрүшүүдө

Эртең, 17-ноябрда футбол боюнча улуттук курама командабыз Дүйнө чемпиондугунун тандоо турунда Иордания курамасы менен беттешет. Бишкектеги Д.Өмүрзаков атындагы стадиондо орун алчу беттешке кыргыз футболчулары кызуу даярдык көрүшүүдө.

КРнын Футбол федерациясынан кабарлашкандай, Австралиядан 14-ноябрь күнү келген футболчуларыбыз дароо эле кийинки беттешке даярдык көрүп жатышат. Командага өткөн оюнда жардам бере албаган Антон Землянухин, Мирлан Мурзаев сыяктуу футболчулар да кошулушту. Австралия менен болгон оюнда жеңил жаракат алган Бактияр Дүйшөбеков жана Иван Филатов алгач өзүнчө топто машыгышты.

Кошумчалай кетсек, кыргыз футболчуларынын Иорданияга каршы беттешин түркмөнстандык калыс Чарымурат Курбанов тейлейт. Беттешке 19:30да старт берилет.